એપલ કંપની તેનો વધુ એક સ્ટોર નોઈડામાં 11 ડિસેમ્બરે શરૂ કરશે.

એપલ કંપની તેનો વધુ એક સ્ટોર નોઈડામાં 11 ડિસેમ્બરે શરૂ કરશે. કંપનીએ સત્તાવારરીતે આ અંગેની જાહરાત શુક્રવારે કરી હતી. ક્યુપરટિનો સ્થિત ટેક જાયન્ટ એપલ દ્વારા 2023 માં એપલ સાકેત ખોલ્યા બાદ આ બીજો સ્ટોર બની રહેશે. એક અહેવાલ મુજબ, એપલ મુંબઈમાં પણ તેના વિસ્તરણની યોજના બનાવી રહી છે અને આવતા વર્ષે 2026માં બીજા સ્ટોરની જાહેરાત કરી શકે છે. નોઈડામાં ખોલાઈ રહેલા સ્ટોરને એપલ નોઈડા તરીકે ઓળખવામાં આવશે, તે નોઈડાના સેક્ટર 18 માં આવેલા DLF મોલ ઓફ ઈન્ડિયા ખાતે ખોલવામાં આવશે. કંપની દ્વારા શુક્રવારે રિટેલ સ્ટોર માટે બેરિકેડનું અનાવરણ કરવામાં આવ્યું હતું, જેમાં મોર - ભારતના રાષ્ટ્રીય પક્ષી પ્રેરિત જીવંત પીંછા દર્શાવવામાં આવ્યા છે.

એપલ દ્વારા સપ્ટેમ્બરમાં બેંગલુરુમાં એપલ હેબ્બલ અને પુણેમાં એપલ કોરેગાંવ પાર્કના ઉદઘાટન પછી, આ ભારતમાં ત્રીજો એપલ સ્ટોર છે જેમાં મોરપિચ્છ પ્રેરિત લોન્ચ કેમ્પેઇન છે.

ભારતમાં અન્ય સત્તાવાર એપલ સ્ટોર્સની જેમ, એપલ નોઈડાના ગ્રાહકો iPhone, iPad, Mac સહિતના એપલ ઉત્પાદનો ખરીદી શકશે. ઉત્પાદનોની લાઇનઅપમાં કંપનીની નવીનતમ iPhone 17 શ્રેણી, Apple Watch Series 11, AirPods Pro (થર્ડ જનરેશન), અને નવા iPad, iMac અને MacBook ઉપકરણોનો સમાવેશ થાય છે.

એપલ ક્રિએટિવ્સ દ્વારા તેના રિટેલ સ્ટોર પર મફત "ટુડે એટ એપલ" સેશન યોજશે. જેમાં ગ્રાહકોને કલા, કોડિંગ, સંગીત અને ફોટોગ્રાફી સહિતના વિવિધ વિષયો પર ફ્રીમાં શિક્ષિત કરવામાં આવશે.

એપલ નોઈડામાં જીનિયસ બાર પણ હોવાની અપેક્ષા છે. અહીં ગ્રાહકો તેમના ડિવાઈઝને અપડેટ કરવા માટે એપોઇન્ટમેન્ટ શેડ્યૂલ કરી શકશે અને એપલ-પ્રમાણિત ટેકનિશિયન પાસેથી એપલના ઓરિજિનલ પાર્ટ મેળવી રીપેરીંગ કરાવી શકશે.

આ સાથે જ એપલ 'વિડિઓ પર નિષ્ણાત સાથે ખરીદી કરો' સેવાઓ પણ આપશે. તે ગ્રાહકોને વ્યક્તિગત ખરીદી ભલામણો મેળવવા, વિવિધ ઉત્પાદન મોડેલોની તુલના કરવા, ઉપલબ્ધ ખરીદી વિકલ્પો જોવા અને એપલ ઉપકરણો વિશે વધુ જાણવા માટે વિડિઓ કૉલ દ્વારા જાણકાર એપલ નિષ્ણાતો સાથે જોડાઈ આવશ્યક સલાહ મેળવી શકશે.
આઈફોન નિર્માતા કંપની દેશમાં તેની રિટેલ હાજરી વધારવા માટે એપલ નોઈડા ઉપરાંત, આક્રમક વ્યૂહરચનાના ભાગ રૂપે મુંબઈમાં વિસ્તરણ કરવાની યોજના ધરાવે છે. એપલ આવતા વર્ષે મુંબઈમાં એક નવો સ્ટોર ખોલશે. આ અંગેની પુષ્ટિ એપલના રિટેલ અને પીપલના સિનિયર વાઇસ પ્રેસિડેન્ટ ડીયર્ડ્રે ઓ'બ્રાયને આપી હતી. આ નવો સ્ટોર રાજ્યમાં બીજા એપલ સ્ટોર તરીકે એપલ બીકેસીમાં જોડાય તેવી અપેક્ષા છે.