નથીંગ ફોન 3a સ્નેપડ્રેગન ચિપસેટ અને AI અપગ્રેડ સાથે આવશે

નથીંગ ફોન 3a સિરીઝ 4 માર્ચે લોન્ચ થવાની છે. લોન્ચ પહેલા કંપનીએ નવા સ્માર્ટફોન વિશે કેટલીક મહત્વપૂર્ણ જાણકારીઓ શેર કરી છે. નથીંગ CEO Carl Pei એ ખુલાસો કર્યો છે કે નથીંગ ફોન 3a ક્વાલકોમ સ્નેપડ્રેગન ચિપસેટ સાથે આવશે. અગાઉ, નથીંગ ફોન 2a મીડિયાટેક ડાયમેન્સિટી 7200 Pro SoC સાથે આવ્યું હતું. નવા નથીંગ ફોન 3a માં પ્રોસેસર અને ન્યુરલ પ્રોસેસિંગ યુનિટ (NPU) માટે મહત્ત્વના અપગ્રેડ આપવામાં આવશે. આ અપગ્રેડ AI પ્રોસેસિંગમાં મોટા સુધારા લાવશે.

નથીંગ ફોન 3a માટે સ્નેપડ્રેગન ચિપસેટ પસંદ કરાયો

Carl Pei એ કોમ્યુનિટી પોસ્ટમાં જણાવ્યું કે નથીંગ ફોન 3a માટે સ્નેપડ્રેગન ચિપસેટ અપનાવવામાં આવ્યો છે. તેમણે કહ્યું, "હું ખુશી સાથે જાહેરાત કરું છું કે અમે નથીંગ ફોન 3a માટે ફરી ક્વાલકોમ સ્નેપડ્રેગન નો ઉપયોગ કરી રહ્યાં છીએ." તેમણે ચોક્કસ સ્નેપડ્રેગન મોડેલ જાહેર કર્યું નથી, પણ CPU અગાઉના મોડેલ કરતા 25% વધુ ઝડપી અને NPU 72% વધુ શક્તિશાળી હશે.

અગાઉના રિપોર્ટ્સ મુજબ, નથીંગ ફોન 3a સ્નેપડ્રેગન 7s Gen 3 ચિપસેટ સાથે આવી શકે છે. આ સ્માર્ટફોનમાં 6.8-ઇંચની Full-HD+ AMOLED ડિસ્પ્લે 120Hz રિફ્રેશ રેટ સાથે મળશે. તેમાં નથીંગ OS 3.1 અને એન્ડ્રોઇડ 15 જોવા મળી શકે છે. ગ્લિફ ઇન્ટરફેસ પણ હોવાની સંભાવના છે.

નથીંગ ફોન 3a માટે નવો બટન દેખાયો

કેટલાક રિપોર્ટ મુજબ, નથીંગ ફોન 3a ની જમણી બાજુ એક વધારાનું બટન હશે, જે કેમેરા માટે ફાસ્ટ શટર બટન હોઈ શકે છે. અન્ય શક્યતાઓ અનુસાર, આ એક એક્શન બટન પણ હોઈ શકે છે, જે AI કમાન્ડ્સ અથવા મલ્ટી-ટૉગલ ફંક્શન માટે ઉપયોગ થઈ શકે છે.

ભારતમાં નથીંગ ફોન 3aનું ઉત્પાદન થશે

નથીંગ ફોન 3a સિરીઝની એસેમ્બલી ભારતના ચેન્નઈમાં કંપનીના મેન્યુફેક્ચરિંગ પ્લાન્ટમાં થશે. કંપનીએ જણાવ્યું છે કે પ્લાન્ટમાં 500થી વધુ કર્મચારીઓ છે, જેમાં 95% મહિલા કર્મચારીઓ છે. આ સ્માર્ટફોન માત્ર ભારત માટે હશે કે ગ્લોબલી એક્સપોર્ટ થશે, તે અંગે કોઈ સ્પષ્ટતા નથી.