Vivo S2 ટૂંક સમયમાં ભારતમાં આવી શકે છે , જાણો સંભવિત કિંમત અને ફીચર્સ

Vivo ફરી એકવાર પોતાની S સિરીઝને ભારતીય બજારમાં લાવવાની તૈયારીમાં હોવાનું જણાઈ રહ્યું છે . કંપનીએ સત્તાવાર રીતે S સિરીઝના આગામી સ્માર્ટફોનને ટીઝ કર્યો છે . ભારતમાં છેલ્લે Vivo S1 વર્ષ 2019માં લોન્ચ થયો હતો અને હવે લગભગ સાત વર્ષ બાદ આ સિરીઝ ફરી પાછી આવવાની શક્યતા છે . અહેવાલો મુજબ આગામી મોડલ Vivo S2 નામથી રજૂ થઈ શકે છે . કંપનીએ હજી સુધી ફોનના સંપૂર્ણ સ્પેસિફિકેશન્સ જાહેર કર્યા નથી , પરંતુ ટીઝરમાં કેટલાક મહત્વના સંકેતો આપવામાં આવ્યા છે .

લીક અને ટિપસ્ટર અભિષેક યાદવના દાવા મુજબ Vivo S2 ભારતમાં 6 ઓગસ્ટના રોજ લોન્ચ થઈ શકે છે . આ સાથે ફોનનું વેચાણ 11 ઓગસ્ટથી શરૂ થવાની પણ ચર્ચા છે . કંપનીએ ફોનનું પ્રમોશનલ પોસ્ટર પણ જાહેર કર્યું છે , જેના કારણે ટૂંક સમયમાં લોન્ચ થવાની શક્યતા વધુ મજબૂત બની છે .

Vivo S2 સ્પેસિફિકેશન્સ :

લીક થયેલી માહિતી અનુસાર Vivo S2માં 6.59 ઈંચનું OLED ડિસ્પ્લે આપવામાં આવી શકે છે . આ ડિસ્પ્લે 1.5K રિઝોલ્યુશન અને 120Hz રિફ્રેશ રેટ સાથે આવી શકે છે . આ ઉપરાંત ફોનમાં ઈન - ડિસ્પ્લે ફિંગરપ્રિન્ટ સ્કેનર પણ આપવામાં આવી શકે છે .

પરફોર્મન્સ માટે ફોનમાં Qualcomm Snapdragon 8 Gen 5 પ્રોસેસર મળવાની શક્યતા છે . ડિવાઈસમાં 8GB RAM આપવામાં આવી શકે છે . સ્ટોરેજ માટે 128GB અને 256GB એમ બે વિકલ્પ ઉપલબ્ધ થઈ શકે છે .

કલર વિકલ્પોની વાત કરીએ તો Vivo S2 Sapphire Blue , Regal Bronze અને Silk White જેવા ત્રણ કલર વેરિઅન્ટમાં રજૂ થઈ શકે છે .

Vivo S2ની સંભવિત કિંમત :

લીક અનુસાર Vivo S2ની ભારતમાં શરૂઆતની કિંમત આશરે રૂપિયા 38,000 હોઈ શકે છે . જયારે ટોપ વેરિઅન્ટની કિંમત લગભગ રૂપિયા 42,000સુધી જઈ શકે છે . જોકે કંપનીએ હજુ સુધી કિંમત અને લોન્ચ તારીખ અંગે કોઈ સત્તાવાર જાહેરાત કરી નથી .