12,000mAh બેટરી સાથે Honor Power 3 થઈ શકે છે લોન્ચ , જાણો ડિટેલ્સ

Honor ટૂંક સમયમાં 12,000mAhની મોટી બેટરી ધરાવતો નવો સ્માર્ટફોન લોન્ચ કરી શકે છે . તાજેતરમાં કંપનીએ તેનો ખુબ જ ચર્ચિત " રોબોટ ફોન " રજૂ કર્યો હતો . આ ફોનમાં ઉપરની તરફ ગિમ્બલ કેમેરા આપવામાં આવ્યો છે , જે બટન દબાવતા યુઝરની સામે મુવ થઈ શકે છે . હવે Honorના નવા ફોનને લઈને નવી માહિતી સામે આવી છે .

એક રિપોર્ટ અનુસાર , Honor પોતાના નવા સ્માર્ટફોનમાં 12,000mAhની મોટી બેટરી આપવાની તૈયારી કરી રહી છે . ટિપસ્ટર Digital Chat Station ના જણાવ્યા અનુસાર , હાલમાં કંપની 11,790mAh ની બેટરીનું ટેસ્ટિંગ કરી રહી છે . આ બેટરીનું રેટિંગ 43.86Wh છે . તેથી ફોન લોન્ચ સમયે તેને લગભગ 12,000mAhની બેટરી તરીકે રજૂ કરવામાં આવી શકે છે .

આ નવો ફોન Honorની Power સિરીઝનો ભાગ હોઈ શકે છે . એવી ચર્ચા છે કે તેમાં Honor Power 3 નામનું મોડલ સામેલ હોઈ શકે છે . આ ફોનને 2027ની શરૂઆતમાં લોન્ચ કરવામાં આવે તેવી શક્યતા છે .

આ ફોનના પ્રોસેસરને લઈને પણ માહિતી સામે આવી છે . તેમાં MediaTek Dimensity 8600 ચિપસેટ મળી શકે છે . આ 3nm ટેક્નોલોજી પર આધારિત ઓક્ટા- કોર પ્રોસેસર હોવાની શક્યતા છે . જો આવું થાય છે , તો ફોનમાં મોટી બેટરી સાથે સારો પરફોર્મન્સ પણ મળી શકે છે .

Honor પહેલા પણ મોટી બેટરીવાળા ફોન લોન્ચ કરી ચુકી છે . Honor X80 Pro Maxમાં 11,000mAhની બેટરી આપવામાં આવી છે . તેમાં 6.8 ઇંચની 1.5K LTPS AMOLED ડિસ્પ્લે છે , જે 120Hz રિફ્રેશ રેટને સપોર્ટ કરે છે . ફોનમાં Snapdragon 6 Gen 5 ચિપસેટ અને Adreno 812 GPU આપવામાં આવ્યા છે .

કેમેરાની વાત કરીએ તો Honor X80 Pro Maxમાં OIS અને 10x ડિજિટલ ઝૂમ સાથે 50MPનો રિયર કેમેરા છે . સેલ્ફી માટે 8MPનો ફ્રન્ટ કેમેરા મળે છે . ફોનમાં 90W ફાસ્ટ ચાર્જિંગનો સપોર્ટ પણ આપવામાં આવ્યો છે . હવે Honor 12,000mAhની બેટરી સાથે નવો ફોન લાવે છે કે નહીં , તેના પર સૌની નજર રહેશે .