નાના ડાયનેમિક આઇલેન્ડ અને A20 ચિપ સાથે આવી શકે છે iPhone 18 Pro

Appleના આગામી ફ્લેગશિપ સ્માર્ટફોન iPhone 18 Pro ને લઈને નવા લીક્સ સામે આવ્યા છે . ફોનના ડિઝાઈન અને ફીચર્સ અંગે અગાઉથી અનેક માહિતી  બહાર  આવી ચૂકી છે , પરંતુ હવે તેના સંભવિત કલર વેરિઅન્ટસ પણ ચર્ચામાં આવ્યા છે . તાજેતરના લીક મુજબ , iPhone18 Pro  અને iPhone18 Pro Max  ચાર નવા કલરમાં બજારમાં આવી શકે છે .  iPhone 18 Pro અને iPhone 18 Pro Max ના કલર વેરિઅન્ટ એક બીજાથી અલગ હોઈ શકે છે .

સોશિયલ મીડિયા પ્લેટફોર્મ X પર જાણીતા લીકસ્ટર Sony Dickson દ્રારા શેર કરાયેલા ડમી યુનિટ્સમાં ફોનના જુદા જુદા કલર અને ડિઝાઈનની ઝલક પણ જોવા મળી છે . આ લીકથી સંકેત મળે છે કે Apple આ વખતે તેના પ્રો મોડેલ્સ માટે થોડા અલગ અને પ્રીમિયમ કલર વિકલ્પો રજૂ કરવાની તૈયારીમાં છે .

નવી લીક થયેલી માહિતી અનુસાર , iPhone 18 Pro  સિરીઝ Silver , Black , Light Blue અને Dark Cherry કલરમાં ઉપલબ્ધ થઈ શકે છે .ખાસ કરીને Dark  Cherry કલર સૌથી વધુ ધ્યાન આકર્ષી રહ્યો છે , કારણ કે Apple એ પહેલા ક્યારેય આ પ્રકારનો શેડ પોતાના iPhone Pro મોડેલમાં રજૂ કર્યો નથી . ઉપરાંત  , ઘણા વર્ષો બાદ કંપની શુદ્ધ Black કલરને ફરી રજૂ કરી શકે તેવી પણ ચર્ચા છે .

ડિઝાઈનની વાત કરીએ તો , પાછળના ભાગમાં કેમેરા સેટઅપ પહેલાની Pro સિરીઝ જેવો જ જોવા મળે છે . જોકે , કેમેરા મોડયુલ વધુ પહોળું અને પ્રીમિયમ  લુક સાથે આવશે તેવું માનવામાં આવે છે .

આ ફોનના ફ્રન્ટ ભાગમાં પણ મહત્વપૂર્ણ ફેરફાર જોવા મળી શકે છે . રિપોર્ટ્સ અનુસાર , Apple ડાયનેમિક આઇલેન્ડનું કદ નોંધપાત્ર રીતે નાનું કરી શકે છે . તેના માટે કંપની Face ID સિસ્ટમના કેટલાક ભાગોને ડિસ્પ્લેની નીચે શિફ્ટ કરી શકે છે . જયારે સેલ્ફી કેમેરા અને Dot Projector ડાયનેમિક આઇલેન્ડમાં જ રહે તેવી શક્યતા છે  .

પરફોર્મન્સ માટે iPhone 18 Pro માં Appleના A20 ચિપસેટ આપવામાં આવી શકે છે . એવું કહેવામાં આવે છે કે આ ચિપ 2nm પ્રોસેસ ટેક્નોલોજી પર આધારિત  હશે , જે વધુ ઝડપ  અને પાવર આપશે .

અહેવાલો મુજબ , Apple સપ્ટેમ્બર 2026માં iPhone 18 Pro સિરીઝને લોન્ચ કરી શકે છે . જોકે કંપનીએ હજુ સુધી આ સ્માર્ટફોન સંબંધિત કોઈ સત્તાવાર  જાહેરાત કરી નથી . તેથી હાલમાં બહાર આવેલી તમામ વિગતોને લીક અને અટકળો તરીકે જ જોવી જોઈએ .