IFA 2026માં રજૂ થશે Tecnoનો બેઝલ-લેસ સ્માર્ટફોન , એજ ટુ એજ ડિસ્પ્લેએ ખેંચ્યું ધ્યાન

સ્માર્ટફોનની ડિઝાઈનમાં ડિસ્પ્લે સૌથી મહત્વનો ભાગ હોય છે . ફોન કેટલો સરસ દેખાય છે તે તેની સ્ક્રીનની આસપાસના બેઝલ્સ કેટલા પાતળા છે તેના પર પણ આધાર રાખે છે . છેલ્લા કેટલાક વર્ષોમાં કંપનીઓએ લગભગ 1.3મિમી જેટલા પાતળા બેઝલ્સવાળી ડિસ્પ્લે બનાવવામાં સફળતા મેળવી છે . હવે OLED ડિસ્પ્લે ટેક્નોલોજીની મદદથી ટૂંક સમયમાં 1 મિમીથી પાતળા બેઝલ્સવાળા સ્માર્ટફોન જોવા મળી શકે છે . આ વચ્ચે એક એવી કંપની સામે આવી છે , જે આ મામલે Apple અને Samsung જેવી મોટી કંપનીઓને પણ ટક્કર આપી રહી છે .

Tecnoએ તેના પહેલા બેઝલ્સ - લેસ કન્સેપ્ટ  સ્માર્ટફોનની ઝલક રજૂ કરી છે . કંપની આ ફોનને સપ્ટેમ્બર 2026માં યોજાનારા IFA 2026 ઇવેન્ટમાં રજૂ કરશે . Tecnoએ સત્તાવાર રીતે તેની નવી જનરેશનના કન્સેપ્ટ ફોનનો વિડીયો શેર કર્યો છે . જો આ ટેક્નોલોજી સફળ થાય છે તો ડિસ્પ્લે  ડિઝાઈનમાં Tecno એક મોટું સ્ટેપ લેનારી પહેલી કંપની બની શકે છે .

બીજી તરફ , Apple વર્ષ 2027માં iPhoneની 20મી વર્ષગાંઠે iPhone 20 Pro લોન્ચ કરી શકે છે . અહેવાલો મુજબ , આ ફોનમાં પણ બેઝલ - લેસ ડિસ્પ્લે આપવામાં આવી શકે છે . પરંતુ Tecnoએ આ પ્રકારનો કન્સેપ્ટ ફોન પહેલેથી જ દુનિયા સામે રજૂ કરી દીધો છે . કંપનીએ ' ઝીરો - મિલિમીટર બેઝલ ' ડિસ્પ્લેની પહેલી ઝલક બતાવતો વિડીયો પણ જાહેર કર્યો છે .

Tecnoના આ કન્સેપ્ટ ફોનમાં સ્ક્રીનની આસપાસ લગભગ કોઈ કિનારી જોવા મળતી નથી . કંપનીએ આ ડિઝાઇન માટે નવી સ્ક્રીન પેકેજિંગ ટેક્નોલોજી , આધુનિક અને નવી એન્જિનિયરિંગ ટેક્નિકનો ઉપયોગ કર્યો છે . ફોનમાં એજ - ટુ - એજ ડિસ્પ્લે છે , જેના કારણે આખો આગળનો ભાગ સ્ક્રીન જેવો દેખાય છે . સેલ્ફી કેમેરા માટે પંચ - હોલ કટઆઉટ પણ આપવામાં આવ્યો છે .

હાલમાં આ માત્ર કન્સેપ્ટ ફોન છે , એટલે તેને બજારમાં આવવામાં હજુ થોડો સમય લાગી શકે છે . તેમ છતાં , કંપનીએ ટેક્નોલોજી પર મોટાભાગનું કામ પૂર્ણ કરી લીધું હોવાનું માનવામાં આવે છે અને ભવિષ્યમાં તેનું મોટા પાયે ઉત્પાદન શરૂ થઈ શકે છે , જયારે ચર્ચા છે કે Apple તેના iPhone 20 Pro માં ગોળાકાર કિનારીઓવાળી ડિસ્પ્લે આપી શકે છે . હવે જોવાનું રહેશે કે સૌથી પહેલા સંપૂર્ણ બેઝલ - લેસ સ્માર્ટફોન કઈ કંપની સફળતાપૂર્વક બજારમાં લાવે છે .