Apple WWDC 2026 હાઈલાઈટ્સ : Apple Intelligence Siri 2.0 અને iOS 27ના મોટા અપડેટ્સ

WWDC 2026 દરમિયાન એપલે તેના નવા સોફ્ટવેર ઈકોસિસ્ટમનું અનાવરણ કર્યું છે . કંપનીએ આ વર્ષે ખાસ કરીને આર્ટિફિશિયલ ઇન્ટેલિજન્સ ( AI ) , Siri અને કેમેરા સંબંધિત સુવિધાઓ પર ભાર મુક્યો છે . એપલના જણાવ્યા અનુસાર , નવા અપડેટ્સ યુઝર્સને વધુ સ્માર્ટ , ઝડપી અને પર્સનલ અનુભવ  આપશે . ઇવેન્ટમાં કંપનીએ Siri 2.0 રજૂ કરી , જેને અત્યાર સુધીનું સૌથી મોટું અપગ્રેડ ગણાવવામાં આવી રહ્યું છે . નવી Siri હવે એક સ્વતંત્ર એપ તરીકે ઉપલબ્ધ રહેશે અને તેમાં ડાર્ક - થીમ આધારિત ચેટબોટ - સ્ટાઈલ ઇન્ટરફેસ આપવામાં આવ્યું છે .

Siri હવે વધુ સારી રીતે કુદરતી ભાષામાં સમજી શકે છે અને સ્ક્રીન પર દેખાતી માહિતીને પણ ઓળખી શકે છે . આ ઉપરાંત , તે Google Gemini અને અન્ય થર્ડ - પાર્ટી AI મોડલ્સ સાથે પણ કામ કરી શકશે . યુઝર્સ તેની અવાજની ગતિ અને કેટલાક અન્ય વિકલ્પોને પણ પોતાની પસંદગી મુજબ બદલી શકશે .

Apple Intelligenceમાં પણ અનેક સુધારાઓ કરવામાં આવ્યા છે . કંપનીએ Genmoji અને Image Playground જેવી AI આધારિત સુવિધાઓ એડ કરેલી છે . તેની મદદથી યુઝર્સ ટેક્સ્ટના આધારે કસ્ટમ ઈમોજી અને વધુ અસલ તસવીરો બનાવી શકશે . પહેલાની સરખામણીએ AI દ્રારા બનાવવામાં આવતી ઇમેજ હવે વધુ કુદરતી દેખાશે .

કંપનીએ નવી Writing Tool પણ રજૂ કરી છે . આ ફીચર બિલ્ટ - ઈન AI ગ્રામર ચેક કરવાની સુવિધા આપે છે , જે લખતા સમયે થતી ભૂલોને શોધે છે અને તેને સુધારવામાં મદદ કરશે . આ સ્પેલ - ચેક સાથે મળીને કામ કરશે .

કેમેરા  વિભાગમાં પણ અનેક નવા વિકલ્પો ઉમેરવામાં આવ્યા છે . યુઝર્સ હવે ફ્લેશ , ટાઇમર , એક્સપોઝર અને ડેપ્થ ઓફ ફિલ્ડ જેવા સેટિંગ્સને વધુ સરળતાથી કસ્ટમાઈઝ કરી શકશે . કંપનીનો દાવો છે કે iOS 27 પહેલા કરતાં વધુ સ્થિર અને ઝડપી છે . એપ્સ 30 ટકા ઝડપથી ખુલશે , જયારે ફોટા 70 ટકા ઝડપથી લોડ થશે .

વોલેટ એપ માટે કંપનીએ Create a Pass નામનું નવું ફીચર રજૂ કર્યું છે . તેની મદદથી યુઝર્સ કોન્સર્ટ ટિકિટ , લોયલ્ટી કાર્ડ અને અન્ય પાસ સ્કેન કરીને તેની ડિજિટલ નકલ બનાવી શકશે . આ ફીચર જુદા જુદા પ્રકારના કલરફુલ ડિજિટલ પાસ પણ તૈયાર કરી શકે છે .