પાસવર્ડ ભૂલી ગયા છો? ચિંતા નહીં, Google લાવ્યું 'સેલ્ફી વીડિયો' ફીચર; હવે પાસવર્ડ વગર પણ સરળતાથી થશે લોગિન

જો તમે વારંવાર તમારા ઓનલાઈન એકાઉન્ટનો પાસવર્ડ ભૂલી જાઓ છો અને એકાઉન્ટ ઍક્સેસ કરવામાં મુશ્કેલીનો સામનો કરો છો, તો તમારા માટે સારા સમાચાર છે. Googleએ એકાઉન્ટ વેરિફિકેશન માટે Selfie Video ફીચર રજૂ કર્યું છે. આ નવા ફીચરની મદદથી પાસવર્ડ ભૂલી જવા પર પણ એકાઉન્ટ રિકવર કરવું સરળ બનશે. શરૂઆતમાં થોડું સેટઅપ કરવું પડશે, ત્યારબાદ ભવિષ્યમાં પાસવર્ડ યાદ ન હોય તો પણ સરળતાથી લોગિન કરી શકાશે.

Googleનું નવું Selfie Video ફીચર શું છે?

Googleએ પોતાના બ્લોગ પોસ્ટમાં જણાવ્યું છે કે હવે યુઝર્સ માટે એકાઉન્ટમાં લોગિન કરવું વધુ સરળ બનશે. જો કોઈ યુઝર પાસવર્ડ ભૂલી જાય અથવા પોતાના નિયમિત ફોન કે કમ્પ્યુટરની ઍક્સેસ ન હોય, તો Selfie Video એક વૈકલ્પિક લોગિન પદ્ધતિ તરીકે કામ કરશે.

કંપનીના જણાવ્યા મુજબ, જો યુઝર પોતાના એકાઉન્ટમાંથી લૉક થઈ જાય, તો આ ફીચરની મદદથી ઓળખની પુષ્ટિ કરીને ફરીથી એકાઉન્ટમાં સાઇન-ઇન કરી શકશે.

Selfie Video લોગિન કેવી રીતે કામ કરશે?

આ ફીચરનો ઉપયોગ કરવા માટે શરૂઆતમાં એકાઉન્ટ સેટઅપ દરમિયાન યુઝરે પોતાનો સેલ્ફી વીડિયો રેકોર્ડ કરીને અપલોડ કરવો પડશે.

વીડિયો બનાવતી વખતે યુઝરે કેમેરા તરફ જોઈને માથું જમણી-ડાબી તરફ ફેરવવું અથવા હળવેથી હલાવવું પડશે, જેથી ચહેરાના અલગ-અલગ એંગલ રેકોર્ડ થઈ શકે.

જો ભવિષ્યમાં લોગિન કરતી વખતે મુશ્કેલી આવે, તો યુઝરે ફરીથી નવો સેલ્ફી વીડિયો બનાવવાનો રહેશે. ત્યારબાદ Google નવા વીડિયોની સરખામણી સેટઅપ સમયે અપલોડ કરાયેલા વીડિયોથી કરશે. બંને વીડિયો મેળ ખાતા હશે તો યુઝરને એકાઉન્ટમાં પ્રવેશ આપવામાં આવશે.

યુઝર્સને શું ફાયદો મળશે?

આ નવા ફીચર સાથે Google એવી ટેક કંપનીઓની યાદીમાં જોડાયું છે, જે માને છે કે ભવિષ્યમાં ઓનલાઈન ઓળખની પુષ્ટિ માટે પાસવર્ડ કરતાં બાયોમેટ્રિક વેરિફિકેશન વધુ અસરકારક રહેશે.

હાલમાં પાસવર્ડ ભૂલી જવા પર Google સામાન્ય રીતે ફોન નંબર અથવા રિકવરી ઈ-મેલ દ્વારા ઓળખ ચકાસે છે. પરંતુ જો આ બંનેની ઍક્સેસ ન હોય, તો એકાઉન્ટ રિકવર કરવું મુશ્કેલ બની શકે છે. નવા Selfie Video ફીચરથી આવી પરિસ્થિતિમાં પણ યુઝર્સ માટે પોતાના એકાઉન્ટમાં ફરીથી લોગિન કરવું વધુ સરળ બનશે.