હવેથી નહીં રદ કરી શકે કેબ ડ્રાઈવરો એરપોર્ટ અને હોસ્પિટલની રાઈડ : મહારાષ્ટ્રમાં નવા નિયમો

મહારાષ્ટ્ર સરકારે એપ આધારિત કેબ સેવાઓનો ઉપયોગ કરતા મુસાફરોને વધુ સારી સેવા આપવા માટે મહારાષ્ટ્ર મોટર વ્હીકલ એગ્રીગેટર નિયમો 2026 અમલમાં મુક્યા છે . નવા નિયમો મુજબ હવે Ola , Uber અને Rapido જેવી સેવાઓ પર એરપોર્ટ , રેલવે સ્ટેશન અને હોસ્પિટલ જેવી મહત્વપૂર્ણ જગ્યાઓ માટે બુક કરાયેલી રાઈડ ડ્રાઈવર કોઈ યોગ્ય કારણ વગર રદ કરશે તો તેને સામાન્ય દંડ કરતાં પાંચ ગણો વધુ દંડ ભરવો પડશે .

સરકારના જણાવ્યા અનુસાર આવા કેસોમાં વસુલવામાં આવતો દંડ સીધો મુસાફરના એપ એકાઉન્ટમાં ટ્રાન્સફર કરવામાં આવશે . બીજી તરફ , જો કોઈ મુસાફર યોગ્ય કારણ વગર રાઈડ રદ કરશે તો તેને કુલ ભાડાના 5 ટકા અથવા વધુમાં વધુ રૂપિયા 110 દંડ ચૂકવવો પડશે . આ રકમ સંબંધિત ડ્રાઈવરને આપવામાં આવશે .

નવા નિયમોમાં ડ્રાઈવરો  માટે સમયસર પિકઅપ પર પહોંચવું પણ ફરજિયાત બનાવવામાં આવ્યું છે . જો ડ્રાઈવર નક્કી કરેલા સમયથી 10 મિનિટની અંદર મુસાફર સુધી નહીં પહોંચે , તો તેને પણ રાઈડ કેન્સલેશન માનવામાં આવશે . આવા કિસ્સામાં ડ્રાઈવર પર રૂપિયા 100નો દંડ લાગશે . જયારે એરપોર્ટ , રેલવે સ્ટેશન અને હોસ્પિટલ માટેની રાઇડમાં આ દંડ પાંચ ગણો સુધી વધારી શકાય છે .

સરકારે એગ્રીગેટર કંપનીઓ માટે પણ કડક નિયમો જાહેર કર્યા છે . જો કોઈ કંપની વારંવાર નિયમોનું ઉલ્લંઘન કરે , મુસાફરોની સુરક્ષામાં બેદરકારી દાખવે અથવા ભાડા સંબંધિત નિયમોનું પાલન ન કરે તો સરકાર તેનું લાઇસન્સ રદ કરી શકે છે . આ ઉપરાંત કંપની પર રૂપિયા 1 લાખથી લઈને 1 કરોડ સુધીનો દંડ પણ ફટકારી શકાય છે .

પરિવહન મંત્રી પ્રતાપ સરનાઈકના જણાવ્યા અનુસાર મુંબઈ જેવા શહેરોમાં ઘણી વખત ડ્રાઈવરો  ટૂંકા અંતરની અથવા ઓછી અનુકૂળ લોકેશનની બુકિંગ જોઈને રાઈડ રદ કરી દે છે , જેના કારણે મુસાફરોને મુશ્કેલીનો સામનો કરવો પડે છે . સરકારને આશા છે કે નવા નિયમો અમલમાં આવ્યા બાદ મનસ્વી રીતે રાઈડ કેન્સલ કરવાની ઘટનાઓમાં ઘટાડો થશે અને મુસાફરોને વધુ વિશ્વસનીય કેબ સેવા મળશે .