WagonR Flex Fuel લોન્ચ , 2027 સુધી દેશમાં 5,000 E85 સ્ટેશનનું લક્ષ્ય

મારુતિ સુઝુકીએ તેની નવી  WagonR Flex Fuel કારનું પ્રોડક્શન - રેડી વર્ઝન રજૂ કર્યું છે . કંપનીએ પહેલા આ કારના પ્રોટોટાઇપ મોડેલ્સનું પ્રદર્શન કર્યું હતું , પરંતુ હવે તેનું ઉત્પાદન માટે તૈયાર મોડેલ રજૂ કરવામાં આવ્યું છે . આ કાર ખાસ E85 ફ્યુઅલ પર ચલાવવા માટે બનાવવામાં આવી છે , જેમાં 85 ટકા સુધી ઇથેનોલનો ઉપયોગ થઈ શકે છે . હાલ આ વાહન માત્ર કોમર્શિયલ ઉપયોગ માટે ઉપલબ્ધ છે . કંપનીએ હજુ સુધી તેની કિંમત અથવા વેચાણ શરૂ કરવાની તારીખ જાહેર કરી નથી .

શું છે WagonR Flex Fuel ?

Maruti  WagonR Flex Fuel એવી કાર છે જે પેટ્રોલ અને ઇથેનોલના જુદા જુદા મિશ્રણ પર ચાલી શકે છે . સરળ ભાષામાં કહીએ તો , આ કાર E20 થી લઈને E100 સુધીના ઇંધણ મિશ્રણનો ઉપયોગ કરી શકે છે . કંપનીએ સૌપ્રથમ આ મોડેલને 2022માં રજૂ કર્યું હતું અને ત્યારબાદ ભારત મોબિલિટી શો 2024માં પણ તેનું પ્રદર્શન કરવામાં આવ્યું હતું .

એન્જિનમાં  કરવામાં આવ્યા ખાસ ફેરફારો 

નવી  WagonR Flex Fuelમાં 1.2 લિટર K12N પેટ્રોલ એન્જિન આપવામાં આવ્યું છે . જોકે , ઇથેનોલ આધારિત ઇંધણ પર સરળતાથી ચાલે તે માટે એન્જિનમાં  કેટલાક મહત્વના ફેરફારો કરવામાં આવ્યા છે . તેમાં નવા ફ્યુઅલ લાઈન , રિકેલિબ્રેડેડ ECU અને ઇથેનોલ સેન્સરનો સમાવેશ થાય છે . ઇથેનોલ સેન્સર ઇંધણમાં રહેલા ઇથેનોલનું પ્રમાણ ઓળખવામાં મદદ કરે છે . કંપનીએ હજુ સુધી કારની પાવર , ટોર્ક અને માઈલેજની વિગતો જાહેર કરી નથી .

E85 ફ્યુઅલની ઉપલબ્ધતા હજુ મુશ્કેલ 

ફ્લેક્સ ફ્યુઅલ વાહનો માટે E85 ઇંધણ જરૂરી છે , પરંતુ હાલમાં તેની ઉપલબ્ધતા દેશમાં ખૂબ મર્યાદિત છે . E85 માટે અલગ સ્ટોરેજ અને ડિસ્પેન્સિંગ સુવિધાની જરૂર પડે છે . હાલ ભારતમાં E20 પેટ્રોલનો ઉપયોગ વધુ પ્રમાણમાં થાય છે .

2027 સુધીમાં 5,000 E85 સ્ટેશનનું લક્ષ્ય 

કેન્દ્રીય પેટ્રોલિયમ અને કુદરતી ગેસ મંત્રી હરદીપ સિંહ પુરીના જણાવ્યા અનુસાર , શરૂઆતમાં દિલ્હી - એનસીઆર અને મુંબઈ - પુણે - નાગપુર કોરિડોરમાં 50થી 100 E85 ડિસ્પેન્સિંગ સ્ટેશન શરૂ કરવામાં આવશે . વર્ષના અંત સુધીમાં આ સંખ્યા 500 સુધી પહોંચાડવાનો લક્ષ્ય છે .
સરકારે 2027 ના અંત સુધીમાં દેશના મુખ્ય શહેરોમાં લગભગ 5,000 E85 ડિસ્પેન્સિંગ સ્ટેશન સ્થાપિત કરવાની યોજના બનાવી છે . સાથે જ E85 ઇંધણની કિંમત હાલના E20 પેટ્રોલ કરતાં ઓછી રાખવાનો પણ પ્રયાસ કરવામાં આવી રહ્યો છે .