ચિપની અછતને લઈને સેમસંગની ચેતવણી , ઇલેક્ટ્રોનિક ડિવાઇસોના ભાવ વધી શકે

સેમસંગે ચેતવણી આપી છે કે વિશ્વભરમાં ચિપની અછત હજુ લાંબા સમય સુધી ચાલુ રહી શકે છે . કંપનીના જણાવ્યા મુજબ , આ સ્થિતિ 2028 સુધી યથાવત રહેવાની શક્યતા છે . જો આવું થાય તો સ્માર્ટફોન ,લેપટોપ , ટેબ્લેટ , LED ટીવી અને અન્ય ઇલેક્ટ્રોનિક ડિવાઈસોની કિંમતોમાં આવતા વર્ષોમાં વધારો થઈ શકે છે . હાલમાં પણ ચિપનો  સ્ટોક તેની માંગ કરતા ઓછો છે અને ભવિષ્યમાં તેમાં મોટા સુધારાના સંકેતો દેખાતા નથી .

હાલમાં સેમસંગ ઇલેક્ટ્રોનિક્સે જણાવ્યું છે કે તેના ચિપ બિઝનેસના પ્રોફિટમાં મોટો વધારો થયો છે . કંપનીએ વિશ્વના કેટલાક મોટા ડેટા સેન્ટરો સાથે ઘણા વર્ષો માટે ચિપ સપ્લાય માટેનો કરાર કર્યો છે . આ કારણે આવતા વર્ષોમાં મેમેરી ચિપ્સની માંગ વધુ વધવાની છે એવું માનવામાં આવી રહ્યું છે . રોઈટર્સના અહેવાલ મુજબ , ચિપની આ અછત ટૂંક સમયમાં દૂર થાય તેવી શક્યતા ઓછી છે .

જોકે સેમસંગ ભવિષ્યને લઈને વધુ સકારાત્મક વિચાર રાખે છે , ઇન્વેસ્ટરોમાં  હજુ પણ ચિંતા દેખાઈ રહી  છે . તેમની ચિંતા એ છે કે AI માટે ટેક કંપનીઓ દ્રારા કરવામાં આવતો ભારે ખર્ચ બીજા ક્ષેત્રોની વૃદ્ધિને પણ અસર કરી શકે છે .અહેવાલ મુજબ ,  એક સમયે સેમસંગના શેરમાં 8.4 ટકાનો વધારો જોવા મળ્યો હતો પરંતુ દિવસના અંતે 0.7 ટકા ઘટીને બંધ થયો હતો જોકે બીજી એક કંપની SK Hynixના શેરમાં 5.6 ટકાનો ઘટાડો નોંધાયો હતો .

સેમસંગે જણાવ્યું છે કે તેને વિશ્વની પાંચ મોટી ડેટા સેન્ટર કંપનીઓ સાથે સપ્લાય કરાર કર્યા છે અને અન્ય પાંચ કંપનીઓ સાથે પણ વાતચીત અંતિમ સ્ટેપમાં છે . જોકે કંપનીનું માનવું છે કે 2028 પહેલા ચિપના સ્ટોકમાં ખાસ સુધારો થવાની સંભાવના નથી .

સેમસંગના મેમરી વિભાગના ઊંચા અધિકારી કિમ જી - જૂનના જણાવ્યા અનુસાર, 2027 સુધી DRAM અને અન્ય મેમરી ચિપ્સની માંગ વધુ વધી શકે છે . સ્ટોક ઓછો હોવાથી RAM અને SSD જેવી સ્ટોરેજ પ્રોડક્ટ્સના ભાવમાં પહેલેથી જ મોટો વધારો જોવા મળી રહ્યો છે . જો આ સ્થિતિ આવી રહેશે , તો સ્માર્ટફોન , લેપટોપ , ટેબ્લેટ અને અન્ય ઇલેક્ટ્રોનિક ડિવાઈસો ખરીદવા માટે ગ્રાહકોને પહેલા કરતા વધુ ખર્ચ કરવો પડી શકે છે .