AI બધું કરી શકતું નથી , Ford , IBM સહિત અનેક કંપનીઓ ફરી કર્મચારીઓને આપી રહી છે નોકરી

છેલ્લા કેટલાક મહિનાઓમાં આર્ટિફિશિયલ ઇન્ટેલિજન્સ ( AI ) ના વધતા ઉપયોગને કારણે વિશ્વભરની ઘણી મોટી કંપનીઓએ હજારો કર્મચારીઓની છટણી કરી હતી . કંપનીને લાગ્યું હતું કે હવે ઘણા કામ AI દ્રારા સરળતાથી થઈ શકે છે , તેથી માનવ કર્મચારીઓની જરૂર ઓછી રહેશે . પરંતુ હવે સ્થિતિ બદલાતી જોવા મળી રહી છે .

તાજેતરના અહેવાલો મુજબ , અનેક મોટી  ટેક કંપનીઓ ફરીથી કર્મચારીઓની ભરતી શરૂ કરી રહી છે . કંપનીઓને સમજાયું છે કે દરેક કામ AI કરી શકતું નથી . ખાસ કરીને જ્યાં ગુણવત્તા , અનુભવ અને ગ્રાહકો સાથે સીધો સંપર્ક જરૂરી હોય છે , ત્યાં માનવ કર્મચારીઓની ભૂમિકા હજુ પણ ખુબ મહત્વની છે .

CNBC ના અહેવાલ અનુસાર , AI પર સંપૂર્ણ આધાર રાખવાનો નિર્ણય ઘણી કંપનીઓ માટે યોગ્ય સાબિત થયો નથી . હવે કંપનીઓ ફરીથી અનુભવી કર્મચારીઓને નોકરી પર રાખી રહી છે જેથી તેમના બિઝનેસને વધુ સારી રીતે સંભાળી શકાય . સાથે જ ઇન્વેસ્ટરોમાં પણ ચિંતા છે કે ફાઇનાન્સિયલ માર્કેટમાં ચાલી રહેલો AI કેટલો સમય ટકી રહેશે તે અંગે કોઈ ખાતરી નથી .

ઓટોમોબાઇલ કંપની Ford પણ હવે ફરીથી ભરતી શરૂ કરનાર કંપનીઓમાં સામેલ છે . કંપની સૈંકડો અનુભવી એન્જિનિયરોને ફરીથી નોકરી પર રાખી રહી છે . Fordનું કહેવું છે કે વાહનોની ગુણવત્તા સંબંધિત કેટલીક સમસ્યાઓ AI આધારિત ઓટોમેટેડ સિસ્ટમથી ઉકેલી શકાઈ નહોતી . કંપનીના વાઇસ પ્રેસિડેન્ટ ચાર્લ્સ પૂને જણાવ્યું કે AI એક શક્તિશાળી ટૂલ છે , પરંતુ તે એટલું જ સારું કામ કરે છે જેટલી સારી માહિતીથી તેને તાલીમ આપવામાં આવી હોય .

માત્ર Ford જ નહીં , પરંતુ ઓસ્ટ્રેલિયાની Commonwealth Bank અને સોફ્ટવેર કંપની IBM જેવી મોટી કંપનીઓ પણ ફરીથી કર્મચારીઓને હાયર કરી રહી છે . ગયા વર્ષે  Commonwealth Bank  એ 40થી વધુ કસ્ટમર સર્વિસ કર્મચારીઓને હટાવી તેમની જગ્યાએ AI વોઇસ બોટ મુક્યો હતો . પરંતુ AI વધતા કોલ્સ અને ગ્રાહકોની સમસ્યાઓને યોગ્ય રીતે સંભાળી શક્યું નહીં . જેના કારણે બેંકે પોતાનો નિર્ણય બદલીને ફરીથી કર્મચારીઓની ભરતી શરૂ કરી .

આ તમામ ઘટનાઓ દર્શાવે છે કે AI અનેક કામ સરળ બનાવી શકે છે , પરંતુ દરેક ક્ષેત્રમાં તે માનવ કર્મચારીઓનું સંપૂર્ણ જગ્યા લઈ શકતું નથી . ખાસ કરીને કસ્ટમર સર્વિસ , ગુણવત્તાને જાળવી રાખનાર અને અનુભવ આધારિત કામોમાં આજે પણ માણસોની જરૂરિયાત  રહેશે .