OnePlus Nord Buds 4ની મુખ્ય ફીચર્સ જાહેર, ફાસ્ટ ચાર્જિંગ સાથે મળશે પ્રીમિયમ ઓડિયો અનુભવ

OnePlus એ તેના OnePlus Nord Buds 4  ઇયરબડ્સ 25 જૂને લોન્ચ કરવા જઈ રહી છે . લોન્ચ પહેલા જ કંપનીએ તેની કેટલીક મુખ્ય વિશેષતાઓ વિષે માહિતી શેર કરી છે . ખાસ કરીને , આ ઇયરબડ્સમાં મળતું 52dB એક્ટિવ નોઇઝ કેન્સલેશન ( ANC ) ફીચર તેનું સૌથી મોટું આકર્ષણ માનવામાં આવી રહ્યું છે . આ ટેક્નોલોજી આસપાસના અવાજને ઘટાડવામાં મદદ કરે છે , જેથી યુઝર્સને કૉલિંગ અને મ્યુઝિક સાંભળતી વખતે વધુ સારો અનુભવ મળે .  આ ઇયરબડ્સ કુલ 54 કલાક સુધીનો બેકઅપ આપી શકે છે .

OnePlus Nord Buds 4  માં 12mm ટાઇટેનિયમ - પ્લેટેડ ડાયનેમિક ડ્રાઈવર્સ આપવામાં આવ્યા છે . કંપનીનો દાવો છે કે આ ડ્રાઈવર્સ વધુ શક્તિશાળી બાસ અને સ્પષ્ટ વોકલ્સ આપે છે . પરિણામે , યુઝર્સને ગીતો સાંભળવા , ફિલ્મો જોવા અને ગેમિંગ દરમિયાન વધુ સારી સાઉન્ડ ક્વોલિટી મળશે .

ડિઝાઇનની વાત કરીએ તો , Nord Buds 4 માં ઇન - ઇયર ડિઝાઇન આપવામાં આવી છે , જેમાં સોફ્ટ સિલિકોન ટિપ્સનો ઉપયોગ કરવામાં આવ્યો છે . આ ડિઝાઇન લાંબા સમય સુધી પહેરવામાં પણ આરામદાયક અનુભવ આપે છે . ઇયરબડ્સમાં સ્ટેમ - સ્ટાઇલ બોડી આપવામાં આવી છે , જયારે ચાર્જિંગ કેસને નવી લંબચોરસ ડિઝાઇન આપવામાં આવી છે . દરેક ઇયરબડનું વજન માત્ર 4.3 ગ્રામ છે , જેના કારણે તે હળવા અને સરળતાથી ઉપયોગ કરી શકાય તેવા બને છે .

કંપનીએ આગળ જણાવતા કહ્યું છે કે Nord Buds 4 માં 3D સ્પેશિયલ ઓડિયો અને ગેમિંગ માટે ખાસ સ્પેશિયલ સાઉન્ડ ઇફેક્ટ્સ પણ મળશે . આ ફીચર્સ ગેમિંગ અને મનોરંજનનો અનુભવ વધુ સારો બનાવશે . નવા ઇયરબડ્સ એસ્ટ્રલ ટીલ અને બ્લેક એમ બે કલર વિકલ્પોમાં ઉપલબ્ધ થશે .

આની બેટરી લાઈફ પણ એક મોટી ખાસિયત છે . OnePlus મુજબ , ચાર્જિંગ કેસ સાથે આ ઇયરબડ્સ કુલ 54 કલાક સુધીનો બેકઅપ આપી શકે છે . આ ઉપરાંત , ફાસ્ટ ચાર્જિંગ સપોર્ટની મદદથી માત્ર 10 મિનિટના ચાર્જમાં 11 કલાક સુધીનો ઉપયોગ મળી શકે છે . જોકે , કંપનીએ હજુ સુધી તેની કિંમત જાહેર કરી નથી . લોન્ચમાં હવે થોડા દિવસો બાકી છે અને તે પહેલા કંપની વધુ ફીચર્સ પણ જાહેર કરી શકે છે .