ગૂગલની નવી Age Verification ટેક્નોલોજી , બાળકો માટે એપ્સ બનશે વધુ સુરક્ષિત

ગૂગલ હવે દુનિયાભરમાં તેની ઉંમર વેરિફિકેશન સિસ્ટમ શરૂ કરવા જઈ રહ્યું છે . કંપનીએ જાહેરાત કરી છે કે હવે Google Play Store પર ઉપલબ્ધ એપ્સમાં યુઝર્સની ઉંમર ચકાસવાની વ્યવસ્થા કરવામાં આવશે . છેલ્લા કેટલાક સમયથી જુદા જુદા દેશોની સંસ્થાઓ એપ સ્ટોર્સ પર બાળકોની સુરક્ષા માટે આવી સિસ્ટમ લાગુ કરવાની માંગ કરી રહી છે . પહેલા એપલે પણ આવી વ્યવસ્થા શરૂ કરી હતી અને હવે ગૂગલ પણ એ જ દિશામાં આગળ વધી રહ્યું છે . આ સિસ્ટમ લાગુ થયા પછી કેટલીક એપ્સનો ઉપયોગ કરતા પહેલા યુઝર્સની ઉંમર ચકાસવામાં આવશે .

ગૂગલે આ માટે Play Age Signal API  નામની નવી ટેક્નોલોજી રજૂ કરી છે . કંપનીના જણાવ્યા અનુસાર , આ સિસ્ટમ યુઝર્સની પ્રાઇવસી જાળવી રાખીને તેમની ઉંમર ક્યાં ગ્રુપમાં આવે છે તેની જાણ કરે છે . એટલે કે યુઝર્સને પોતાની ID , જન્મતારીખ અથવા સેલ્ફી આપવાની જરૂર નહીં પડે . ગૂગલનું ઉદ્દેશ્ય 2026ના અંત સુધીમાં અમેરિકા સહિત તમામ દેશોમાં આ સિસ્ટમ ઉપલબ્ધ કરવાનું છે .

ગયા વર્ષે ગૂગલે Play Age Signal APIને બીટા વર્ઝનમાં રજૂ કરી હતી . આ સિસ્ટમ Family Link એપ સાથે પણ કામ કરે છે . તેની મદદથી માતા - પિતા તેમના બાળકો માટે યોગ્ય વય - મર્યાદા નક્કી કરી શકે છે . ઓસ્ટ્રેલિયા અને કેનેડામાં આ સુવિધા ઓગસ્ટના મધ્ય સુધીમાં શરૂ થવાની શક્યતા છે , જયારે વર્ષના અંત સુધીમાં તેને અન્ય દેશોમાં પણ વિસ્તૃત કરવામાં આવશે .

વિશ્વભરના ઘણા દેશો હવે બાળકોને ઓનલાઈન સુરક્ષિત રાખવા માટે કડક નિયમો બનાવી રહ્યા છે . આ જ કારણસર એપલે ફેબ્રુઆરીમાં પોતાની ઉંમર ચકાસવાની સુવિધા શરૂ થઈ હતી . હવે ગૂગલની નવી સિસ્ટમથી એપ ડેવલપર્સને યુઝર્સની ચોક્કસ જન્મતારીખ જાણ્યા વગર માત્ર તેમની ઉંમરનો યોગ્ય ગ્રુપ જાણી શકશે . સાથે જ માતા - પિતા પોતાના બાળકોની વય - મર્યાદાની માહિતી જરૂર મુજબ એપ્સ સાથે શેર પણ કરી શકશે .