UPI યુઝર્સની ગોપનીયતા વધશે , મોબાઈલ નંબરને બદલે યુઝરનેમ આધારિત IDને પ્રોત્સાહન

UPI દ્રારા ડિજિટલ પેમેન્ટ કરતા કરોડો યુઝર્સની પ્રાઇવસી વધુ સુરક્ષિત બનાવવા માટે નવા પગલાં લેવામાં આવી રહ્યા છે . એક અહેવાલ અનુસાર , નેશનલ પેમેન્ટ્સ કોર્પોરેશન ઓફ ઇન્ડિયા ( NPCI ) " ડિજિટલ પર્સનલ ડેટા પ્રોટેક્શન ( DPDP ) એક્ટ "ને અમલમાં મુકવા માટે UPI એપ્સ અને બેંકો સાથે જરૂરી ફેરફારો અંગે ચર્ચા કરી રહ્યું છે . આ ફેરફારોનો મુખ્ય ઉદેશ્ય યુઝર્સની વ્યક્તિગત માહિતી સુરક્ષિત રાખવાનો અને પેમેન્ટ દરમિયાન મોબાઈલ નંબર જેવી માહિતી જાહેર ન થાય તેની ખાતરી કરવાનો છે .

મનીકંટ્રોલના અહેવાલ મુજબ , NPCI એ UPI એપ્સ અને બેંકોને ગ્રાહકોના મોબાઈલ નંબરને છુપાવવા માટે સૂચના આપી છે . હાલમાં UPIમાં પેમેન્ટ અને વેરિફિકેશન માટે મોબાઈલ નંબરનો ઉપયોગ થાય છે , પરંતુ તેનાથી પ્રાઇવસીનો જોખમ પણ રહે છે . તેથી હવે મોબાઈલ નંબર અને નામ જેવી માહિતી વધુ સુરક્ષિત રાખવામાં આવશે .

અહેવાલો મુજબ , ગયા મહિને NPCIએ એક સૂચના બહાર પાડીને તમામ UPI એપ્સ અને સભ્ય બેંકોને ગ્રાહકો સાથેના દરેક ઇન્ટરફેસ અને મેસેજમાં UPI ID , મોબાઈલ નંબર અને બેંક ખાતા નંબરને છુપાવવાની સૂચના આપી હતી . નવા નિયમ મુજબ , અન્ય લોકોને મોબાઈલ નંબરના માત્ર છેલ્લા ચાર અંક જ જોવા મળશે .

આ ઉપરાંત , QR કોડ સ્કેન કરીને પેમેન્ટ પૂર્ણ થયા પછી પણ મોબાઈલ નંબર દખાશે નહીં . NPCIએ ફેરફારો અમલમાં મુકવા માટે 4 સપ્ટેમ્બરની સમય મર્યાદા નક્કી કરી છે . સાથે જ UPI એપ્સને યુઝર્સ માટે મોબાઈલ નંબરના બદલે યુઝરનેમ આધારિત UPI ID બનાવવાનો વિકલ્પ ડિફોલ્ટ તરીકે ઉપલબ્ધ કરાવવાની પણ સૂચના આપવામાં આવી છે .

હાલમાં મોટાભાગના નવા UPI યુઝર્સ તેમની UPI ID તરીકે મોબાઈલ નંબરનો ઉપયોગ કરે છે . જોકે યુઝરનેમ આધારિત UPI IDની વિકલ્પ પહેલાથી જ ઉપલબ્ધ છે , પરંતુ ઘણા લોકોને તેની જાણ નથી . નવા નિયમો બાદ યુઝરનેમ આધારિત UPI IDનો ઉપયોગ વધવાની શક્યતા છે , જેનાથી યુઝર્સની પ્રાઈવસી વધુ મજબૂત બનશે .