DigiLocker અને mParivahanમાં આ રીતે સેવ કરો ડ્રાઇવિંગ લાયસન્સ , પાકીટ ભુલાય તો પણ નહીં પડે મુશ્કેલી

દેશમાં કાર , બાઈક અથવા સ્કૂટર ચલાવવા માટે ડ્રાઇવિંગ લાયસન્સ હોવું ફરજિયાત છે . પરંતુ ઘણી વખત લોકો ઉતાવળમાં પાકીટ ઘરે ભૂલી જાય છે . આવી સ્થિતિમાં જો ટ્રાફિક પોલીસ લાયસન્સ માંગે અને તમારી પાસે તેની ફિઝિકલ કોપી ન હોય , તો મુશ્કેલી થઈ શકે છે . જોકે , હવે તમે તમારા ફોનમાં ડ્રાઇવિંગ લાયસન્સની ડિજિટલ કોપી રાખીને આ સમસ્યાથી બચી શકો છો .

સરકારની DigiLocker અને NextGen mParivahan એપમાં રાખેલું વર્ચ્યુઅલ ડ્રાઇવિંગ લાયસન્સ કાયદેસર રીતે માન્ય છે . જો તમારા ફોનમાં માત્ર લાયસન્સનો ફોટો અથવા PDF સેવ હોય , તો તેને માન્ય ગણવામાં આવતું નથી .  તેથી હમેશા આ બંને સરકારી એપમાંથી જ ડિજિટલ લાયસન્સનો ઉપયોગ કરો .

DigiLockerમાં ડ્રાઇવિંગ લાયસન્સ કેવી રીતે એડ કરશો ?

• ફોનમાં DigiLocker એપ ખોલો કે ડાઉનલોડ કરો .
• આધાર નંબર અથવા મોબાઈલ નંબરથી લોગ -ઈન કરો .
• સર્ચમાં Ministry Of Road Transport and Highways શોધો .
• Driving License વિકલ્પ પસંદ કરો .
• તમારો ડ્રાઇવિંગ લાયસન્સ નંબર અને જન્મ તારીખ દાખલ કરો .
• Get Document પર ક્લિક કરો .
• ત્યારબાદ તમારું લાયસન્સ Issued Documents વિભાગમાં દેખાશે .
• એકવાર સેવ થઈ જાય પછી , જરૂર પડયે ઈન્ટરનેટ વગર પણ તેને બતાવી શકશો .

NextGen mParivahanમાં ડ્રાઇવિંગ લાયસન્સ કેવી રીતે એડ કરશો ?

• NextGen mParivahan એપ ડાઉનલોડ કરીને ખોલો .
• મોબાઈલ નંબરથી એકાઉન્ટ બનાવી OTP દ્રારા લોગ-ઈન કરો .
• હોમપેજ પર Driving License વિકલ્પ પસંદ કરો . 
• ડ્રાઇવિંગ લાયસન્સ નંબર અને જન્મ તારીખ દાખલ કરીને સર્ચ કરો . 
• વિગતો દેખાય પછી ' Add to Dashboard ' અથવા ' Create Virtual DL ' પર ક્લિક કરો .
• OTP દાખલ કરીને ચકાસણી પૂર્ણ કરો . 
• ત્યારબાદ તમારું વર્ચ્યુઅલ ડ્રાઇવિંગ લાયસન્સ ડેશબોર્ડમાં દેખાશે .
• જરૂર પડે ત્યારે ઈન્ટરનેટ વગર પણ એપમાં જઈને તે બતાવી શકશો .

આ રીતે DigiLocker અને NextGen mParivahanમાં ડ્રાઇવિંગ લાયસન્સ સેવ રાખવાથી ફિઝિકલ લાયસન્સ સાથે રાખવાની ચિંતા રહેતી નથી અને ટ્રાફિક ચેકિંગ દરમિયાન પણ સરળતાથી ડિજિટલ લાયસન્સ બતાવી શકાય છે .