ટચસ્ક્રીન MacBook તરફ Appleનું મોટું પગલું OLED ડિસ્પ્લે સાથે આવી શકે નવું મોડલ

અમેરિકાની કંપની Apple ટૂંક જ સમયમાં OLED ડિસ્પ્લે સાથેનું ટચસ્ક્રીન MacBook Pro લોન્ચ કરવાની તૈયારીમાં છે આવી માહિતી સામે આવી છે . આ લેપટોપ 14 ઇંચ અને 16 ઇંચના સ્ક્રીન વિકલ્પોમાં આવી શકે છે . તેમાં ટચસ્ક્રીન સપોર્ટ પણ મળવાની શક્યતા છે . છેલ્લા કેટલાક વર્ષોમાં પ્રીમિયમ લેપટોપ માર્કેટમાં Appleના MacBookનું વેચાણ વધી રહ્યું છે .

મીડિયા રિપોર્ટ મુજબ , નવા MacBook Pro માટે OLED ટચ ડિસ્પ્લે Samsung Display બનાવી શકે છે . જોકે બંને કંપનીઓ વચ્ચે હજુ સુધી કોઈ પણ સત્તાવાર કરાર થયો નથી . એવું પણ કહેવામાં આવી રહ્યું છે કે Appleએ આ પ્રોજેક્ટની શરૂઆતથી જ Samsungને સાથે રાખ્યું છે . આ ડિસ્પ્લેમાં ઓક્સાઈડ TFT ટેક્નોલોજી , RGB OLED સ્ટ્રક્ચર અને નવી ટચ ટેક્નોલોજીનો ઉપયોગ થઈ શકે છે .

હાલમાં LG કંપની Appleના MacBook Pro  અને OLED ડિસ્પ્લે ધરાવતા iPad Pro માટે ડિસ્પ્લે સપ્લાય કરે છે . પરંતુ નવા ટચસ્ક્રીન MacBook Pro માટે LGને સામેલ કરવામાં આવે તેવી શક્યતા ઓછી રહેશે .

પહેલાના કેટલાક અહેવાલોમાં એવો પણ દાવો કરવામાં આવ્યો હતો કે Apple MacBook Ultra નામથી એક નવું મોડલ તૈયાર કરી રહી છે . જો આ માહિતી સાચી સાબિત થાય, તો તે Appleનો  પહેલો ટચસ્ક્રીન લેપટોપ હશે . અત્યાર સુધી Apple એ MacBook  અને iPadને અલગ અલગ ઉપયોગ માટે બનાવ્યા છે . કંપનીનું માનવું છે કે ટચસ્ક્રીન iPad માટે વધુ સારો છે , જયારે MacBookમાં કીબોર્ડ અને ટ્રેકપેડ વધુ ઉપયોગી છે .

તાજેતરમાં Apple એ ભારતમાં નવું MacBook Pro  લોન્ચ કર્યું છે . હવે ટચસ્ક્રીન લેપટોપની વધતી માંગને ધ્યાનમાં રાખીને કંપની પોતાની રણનીતિમાં ફેરફાર કરી શકે છે . નવા ટચસ્ક્રીન MacBookમાં Appleની નવી ચિપ મળી શકે છે અને તે કંપનીનું સૌથી પ્રીમિયમ લેપટોપ બની શકે છે . જોકે Appleએ હજુ સુધી આ લેપટોપ વિશે કોઈ સત્તાવાર જાહેરાત કરી નથી .