CCTV ખરીદવાની જરૂર નહીં , જૂના ફોનથી જ રાખો ઘર પર નજર

આજકાલ સ્માર્ટફોન કંપનીઓ સતત નવા ફીચર્સ સાથે નવા મોડલ લોન્ચ કરી રહી છે . જેના કારણે ઘણા લોકો પોતાના જૂના ફોન બદલીને નવા ફોન ખરીદે છે . પરંતુ પ્રશ્ન એ છે કે જૂના અને સારી રીતે કામ કરતા સ્માર્ટફોનનું શું કરવું ? ઘણા લોકો ફોનને ઘરે જ પડ્યો રહેવા દે છે . જો તમારી પાસે પણ આવો કોઈ જૂનો સ્માર્ટફોન હોય , તો તમે તેને ઘર માટે સિક્યોરિટી કેમેરા તરીકે ઉપયોગ લઈ શકો છો .

જૂના ફોનને સિક્યોરિટી કેમેરામાં ફેરવવા માટે તમારે માત્ર બે સ્માર્ટફોન , ઈન્ટરનેટ કનેક્શન અને એક સિક્યોરિટી કેમેરા એપની જરૂર પડશે . આ રીતે તમે અલગથી CCTV કેમેરા ખરીદ્યા વગર ઘર , બાળકો , પાલતુ પ્રાણીઓ અથવા ઘરના પ્રવેશ પર નજર રાખી શકો છો .

જૂના ફોનને સિક્યોરિટી કેમેરા કેવી રીતે બનાવશો ?

સૌપ્રથમ બે સ્માર્ટફોન તૈયાર રાખો . જૂનો ફોન કેમેરા તરીકે કામ કરશે , જયારે તમારો હાલનો ફોન વિડીયો જોવા માટે ઉપયોગ થશે .બંને ફોનમાં ઇન્ટરનેટ કનેક્શન અને પૂરતી બેટરી હોવી જરૂરી છે .

ત્યારબાદ બંને ફોનમાં સિક્યોરિટી કેમેરા એપ ઈન્સ્ટોલ કરો . એવી એપ પસંદ કરો જેમાં લાઈવ વિડીયો , મોશન ડિટેક્શન , રિમોટ એક્સેસ અને રેકોર્ડિંગ જેવી સુવિધાઓ ઉપલબ્ધ હોય .

એપ ઇન્સ્ટોલ કર્યા પછી બંને ફોનમાં એક જ એકાઉન્ટથી લોગિન કરો . હવે જુના ફોનને " કેમેરા " અને નવા ફોનને "વ્યૂઅર " તરીકે સેટ કરો . ઘણી એપ્સમાં QR કોડ સ્કેન કરીને અથવા એકાઉન્ટ સિંક કરીને આ પ્રક્રિયા સરળતાથી પૂર્ણ કરી શકાય છે .

ત્યારબાદ જૂના ફોનને એવી જગ્યાએ મૂકો જ્યાંથી આખો વિસ્તાર સ્પષ્ટ રીતે દેખાય . વધુ સારું જોવા માટે ફોનને થોડી ઊંચાઈ પર રાખવો જોઈએ .

લાંબા સમય સુધી કેમેરો ચાલુ રહે તે માટે ફોનને ચાર્જર અથવા પાવર બેંક સાથે જોડીને રાખો . આ ઉપરાંત , સતત અને ઝડપી Wi - Fi કનેક્શન હોવું પણ જરૂરી છે , જેથી વિડીયો ફીડમાં કોઈ અટકાવ ન આવે .

એકવાર સેટઅપ પૂર્ણ થયા પછી તમે તમારા હાલના ફોનમાં લાઈવ વિડીયો જોઈ શકશો . જરૂર મુજબ મોશન એલર્ટ , રેકોર્ડિંગ અને નોટિફિકેશન સેટિંગ્સ પણ બદલી શકો છો .

જો તમારી પાસે એકથી વધુ જૂના સ્માર્ટફોન હોય , તો તમે તેમને પણ વધારાના કેમેરા તરીકે ઉપયોગમાં લઈને તમારા ઘરની સુરક્ષા વધુ મજબૂત બનાવી શકો છો .