ઈમેઈલ વેરિફિકેશન હવે ડિવાઈસ લેવલ પર , સાઈન - અપ થશે વધુ સરળ

Google ટૂંક સમયમાં Android પર એપ્લિકેશન સાઈન - અપ કરવાની પ્રક્રિયામાં મોટો બદલાવ લાવવા જઈ રહ્યું છે , જે યુઝર્સ માટે અનુભવને વધુ સરળ અને ઝડપી બનાવી શકે છે  . હાલમાં મોટાભાગની એપ્લિકેશન્સમાં સાઈન - અપ કરતી વખતે OTP અથવા ઈમેઈલ લિંક દ્રારા વેરિફિકેશન કરવાની જરૂર  પડે  છે , જે ઘણીવાર વધારે સમય અને મુશ્કેલ વાળુ લાગે છે . આ સમસ્યાનો ઉકેલ લાવવા માટે , Google એક નવી સિસ્ટમનું પરીક્ષણ કરી રહ્યું છે . જેમાં ઈમેઈલ વેરિફિકેશન સીધું ડિવાઈસ લેવલ પર  થઈ શકે છે . એટલે કે યુઝર્સને અલગથી OTP નાખવાની કે ઈમેઈલ એપ ખોલવાની જરૂર નહીં રહે .

આ નવી સુવિધા હેઠળ , એપ્લિકેશન્સ યુઝર્સના ફોનમાં પહેલાથી જ સેવ થયેલા સુરક્ષિત ID નો ઉપયોગ કરશે . જયારે કોઈ એપ યુઝર્સનું ઈમેઈલ વેરિફાઈ કરવા  માંગશે , ત્યારે સ્ક્રીન પર એક સ્પષ્ટ પ્રોમ્પ્ટ દેખાશે , જેમાં બતાવવામાં આવશે કે કઈ માહિતીની વિનંતી કરવામાં આવી રહી છે . યુઝર એક જ ટેપથી  આ વિનંતીને મંજૂરી આપી શકે છે , જેના કારણે આખી પ્રક્રિયા ખૂબ  જ ઝડપી અને સરળ બની જશે . આ રીતે એપમાંથી બહાર જઈને OTP શોધવાની જરૂરિયાત  પૂરી રીતે દૂર થઈ શકે છે .

સુરક્ષાની વાત કરીએ તો પણ આ  સિસ્ટમ ખૂબ જ મજબૂત છે , કારણ કે કોઈપણ માહિતી યુઝર્સની મંજૂરી વિના શેર કરવામાં આવતી નથી . આ ઉપરાંત  આ પ્રક્રિયા  ક્રિપ્ટોગ્રાફિક રીતે વેરિફાઈડ ડેટા પર આધારિત હોવાથી યુઝર્સની માહિતી વધુ સુરક્ષિત રહે છે . આ ફીચર માત્ર સાઈન - અપ માટે જ નહીં , પરંતુ એકાઉન્ટ રિકવરી , ટ્રાન્ઝેક્શન કન્ફર્મેશન અને એકાઉન્ટ ડિટેઈલ્સ અપડેટ જેવી સંવેદનશીલ પ્રક્રિયાઓને પણ સરળ અને ઝડપી બનાવી શકે છે . જો કોઈ  કારણસર આ નવી સિસ્ટમ બરોબર કામ ન કરે , તો ડેવલપર્સ OTP  અથવા મેન્યુઅલ ઈમેઈલ વેરિફિકેશન જેવા વિકલ્પો પણ ઉપલબ્ધ રાખી શકશે .

હાલમાં આ સુવિધા Android 9 અથવા તેના પછીના વર્ઝન  પર ચાલતા અને અપડેટેડ Google Play Services ધરાવતા ડિવાઇસમાં કાર્ય કરશે અને શરૂઆતમાં  પર્સનલ Google એકાઉન્ટ્સ માટે ઉપલબ્ધ રહેશે . 

કુલ મળીને , આ બદલાવ ભવિષ્યમાં સાઈન - અપ પ્રક્રિયાને વધુ યુઝર ફ્રેન્ડલી , ઝડપી અને સુરક્ષિત બનાવી શકે છે .