નોકરી છોડ્યા બાદ EPFO માં Exit Date અપડેટ કરવી કેમ જરૂરી ? જાણો

નિવૃત્તિ પછીની નાણાકીય સુરક્ષા માટે EPFO સાથે જોડાયેલી માહિતી અપડેટ રાખવી ખુબ જ મહત્વપૂર્ણ છે . સામાન્ય રીતે કર્મચારી નોકરી છોડ્યા બાદ કંપની EPFO  પોર્ટલ પર તેની એક્ઝિટ ડેટ અપડેટ કરે છે , પરંતુ કેટલીક વખત આ પ્રક્રિયામાં મોડું થઈ શકે છે . આવી સ્થિતિમાં કર્મચારીઓ પોતે પણ EPFO પોર્ટલ  દ્રારા પોતાની એક્ઝિટ ડેટ નોંધાવી શકે છે . આ અપડેટથી સર્વિસ રેકોર્ડ યોગ્ય રહે છે , PF ક્લેમ અને ફંડ ટ્રાન્સફર જેવી પ્રક્રિયાઓ સરળ બને છે તેમજ કર્મચારીઓને તેમના PF  ખાતા પર વધુ નિયંત્રણ મળે છે .

EPFO પોર્ટલ પર એક્ઝિટ ડેટ દાખલ કરવાથી તમારા સર્વિસ રેકોર્ડમાં સુધારો થાય છે અને સંબંધિત નોકરીદાતા સાથેનો તમારો કાર્યકાળ સત્તાવાર રીતે પૂર્ણ  ગણાય છે . આ પછી તમે નવા નોકરીદાતા સાથે જોડાઈ શકો છો અને ભવિષ્યમાં PF સંબંધિત પ્રક્રિયાઓ સરળતાથી પૂર્ણ કરી શકો છો .

એક્ઝિટ ડેટ અપડેટ કરવા માટે તમારો આધાર સાથે લિંક કરાયેલા મોબાઈલ નંબર સક્રિય હોવો જરૂરી છે , કારણ કે OTP વેરિફિકેશનની જરૂર પડે છે . ઉપરાંત , નોકરી છોડ્યાને ઓછામાં  ઓછા બે મહિના પૂર્ણ થયેલા હોવા જોઈએ અને તમારો આધાર નંબર EPFO પોર્ટલ પર લિંક તથા ચકાસાયેલ હોવો જોઈએ  .

EPFO પોર્ટલ પર એક્ઝિટ ડેટ કેવી રીતે અપડેટ કરવી ?

• સૌપ્રથમ EPFO ની સત્તાવાર વેબસાઈટ પર જાઓ .
• UAN અને પાસવર્ડની મદદથી તમારા એકાઉન્ટમાં લોગિન કરો .
• " Manage " વિભાગમાં જઈ " Mark Exit " વિકલ્પ પસંદ કરો .
• યોગ્ય PF એકાઉન્ટ પસંદ કરો .
• નોકરી છોડ્યાની તારીખ અને સંબંધિત કારણ દાખલ કરો .
• OTP વેરિફિકેશન પૂર્ણ કરીને માહિતી સબમિટ કરો .

એક્ઝિટ ડેટ અપડેટ કરવાના મુખ્ય ફાયદા :

EPFO પોર્ટલ પર એક્ઝિટ ડેટ અપેડટ કર્યા પછી કર્મચારીઓ PF ફંડ અથવા પેન્શન સંબંધિત ક્લેમ માટે નોકરીદાતાની મંજૂરી પર ઓછી નિર્ભરતા રાખે છે . આ ઉપરાંત , નોકરી બદલતી વખતે PF ખાતા વચ્ચે ફંડ ટ્રાન્સફર કરવાની પ્રક્રિયા સરળ બને છે . આ  પગલું સર્વિસ હિસ્ટ્રીમાં થતી ભૂલો ઘટાડવામાં મદદ કરે છે  અને કર્મચારીઓને પોતાના PF એકાઉન્ટની માહિતી પર વધુ નિયંત્રણ આપે છે .