WhatsAppની આ સેટિંગ બદલો , ફોનનું સ્ટોરેજ બચશે અને પ્રાઇવસી પણ રહેશે સુરક્ષિત

WhatsApp દુનિયાની સૌથી વધુ ઉપયોગમાં લેવાતી મેસેજિંગ એપ્સમાંની એક છે . આ એપમાં એક એવી સુવિધા છે , જેના કારણે ફોનનું સ્ટોરેજ ઝડપથી ભરાઈ શકે છે . ડિફોલ્ટ સેટિંગ્સને કારણે WhatsApp પર આવતા ફોટા , વિડીયો અને અન્ય મીડિયા ફાઇલ્સ આપમેળે ફોનની ગેલેરીમાં સેવ થઈ જાય છે . જો તમે કોઈ ગ્રુપમાં હોવ અથવા રોજના ઘણા ફોટા -વિડીયો મેળવો છો , તો ફોનનું સ્ટોરેજ જલ્દી ભરાઈ જાય છે . સાથે જ , ગેલેરીમાં પ્રાઇવેટ ફોટા અને વિડીયો દેખાતા હોવાથી પ્રાઇવસીની ચિંતા પણ રહે છે .

સારી વાત એ છે કે WhatsAppમાં એવી સેટિંગ્સ ઉપલબ્ધ છે , જેના દ્રારા તમે મીડિયા ફાઇલ્સને આપમેળે સેવ થતી અટકાવી શકો છો . આમ કરવાથી ફોનનું સ્ટોરેજ બચશે અને તમારી પ્રાઇવસી પણ જળવાઈ રહે .

ઓટોમેટિક મીડિયા સેવ કેવી રીતે બંધ કરવું ?

• સૌથી પહેલા તમારા ફોનમાં WhatsApp ખોલો .
• હવે ઉપર જમણી બાજુ આવેલા ત્રણ ડોટ પર ટેપ કરીને Settingsમાં જાઓ .
• ત્યારબાદ Storage and Data વિકલ્પ પસંદ કરો .
• અહીં Media Auto Download પર ટેપ કરો .
• હવે ફોટા , વિડીયો , ઓડિયો અને દસ્તાવેજો ક્યારે ડાઉનલોડ કરવા તે પસંદ કરો . જો તમે ઈચ્છો કે મીડિયા જાતે જ ડાઉનલોડ ન થાય , તો Never વિકલ્પ પસંદ કરો .

જો તમે માત્ર કોઈ ખાસ ચેટ કે ગ્રુપ માટે જ મીડિયા ગેલેરીમાં દેખાવું બંધ કરવા માંગતા હોવ , તો તે ચેટ ખોલો અને કોન્ટેક્ટ કે ગ્રુપના નામ પર ટેપ કરો . ત્યારબાદ Media Visibility વિકલ્પને  બંધ કરી દો . આમ કરવાથી તે ચેટના ફોટા અને વિડીયો ફોનની ગેલેરીમાં દેખાશે નહીં .

આ સેટિંગ તમે અલગ અલગ ચેટ અને ગ્રુપ  માટે પણ લાગુ કરી શકો છો . એકવાર સેટિંગ્સ બદલ્યા પછી , તમારી ગેલેરી તપાસો . હવે WhatsApp પર આવતું નવું મીડિયા આપમેળે સેવ નહીં થાય , જેથી ફોનનું સ્ટોરેજ પણ બચશે અને પ્રાઇવસી પણ જળવાઈ રહેશે .