Meta AI Bug : હેકર્સે Instagram એકાઉન્ટ્સ પર કર્યો કબજો , હજારો યુઝર્સ થયા પ્રભાવિત

મેટાએ જણાવ્યું છે કે તેની AI આધારિત એકાઉન્ટ રિકવરી સિસ્ટમમાં રહેલી એક ખામીને કારણે 20,000થી વધુ Instagram એકાઉન્ટ્સ હેક થયા હતા . આ ખામી હાઈ - ટચ સપોર્ટ ( HTS ) નામની ટૂલમાં હતી , જે લોક થયેલા એકાઉન્ટ્સને ફરીથી શરૂ કરવામાં મદદ કરે છે . હેકર્સે આ ખામીનો ફાયદો ઉઠાવી કેટલાક યુઝર્સના પાસવર્ડ રીસેટ કર્યા અને તેમના એકાઉન્ટ્સમાં પ્રવેશ મેળવી લીધો . ખાસ કરીને એવા એકાઉન્ટ્સ વધુ જોખમમાં હતા , જેમાં ટુ - ફેક્ટર ઓથેન્ટિકેશન ( 2FA ) ચાલુ નહોતું .

છેલ્લા કેટલાક અઠવાડિયાથી ઘણા Instagram યુઝર્સ તેમના એકાઉન્ટ્સમાંથી અચાનક બહાર થઈ જવાની ફરિયાદ કરી રહ્યા હતા . ત્યારબાદ મેટાએ તપાસ શરૂ કરી . કંપનીને 31 મેં , 2026ના રોજ આ ખામી વિશે જાણ થઈ હતી . તપાસમાં જાણવા મળ્યું કે હેકર્સ AI આધારિત સપોર્ટ સિસ્ટમને છેતરીને  એકાઉન્ટ્સના પાસવર્ડ બદલી રહ્યા હતા .

અહેવાલો અનુસાર , HTS સિસ્ટમ એકાઉન્ટ્સ સાથે જોડાયેલા ઈમેઈલ ચકાસણી કરી શક્તિ નહોતી . હેકર્સ AI બોટને સમજાવવામાં સફળ રહ્યા કે તેમનું ઈમેઈલ સરનામું જ એકાઉન્ટના માલિકનું સાચું ઈમેઈલ છે . ત્યારબાદ તેઓ પાસવર્ડ રીસેટ લિંક મેળવી લેતા અને એકાઉન્ટ્સ પર કબજો કરી લેતા .

મેટાના જણાવ્યા અનુસાર , આ પ્રકારનો પહેલો સફળ હુમલો એપ્રિલ 2026માં થયો હતો . ત્યારથી વિશ્વભરમાં 20,000થી વધુ Instagram એકાઉન્ટ્સ પ્રભાવિત થયા છે . કેટલાક જાણીતા અને મોટા એકાઉન્ટ્સ પણ આ ઘટનાનો ભોગ બન્યા હોવાનું કહેવાય છે .

કંપનીએ કહ્યું છે કે હેકર્સે કઈ માહિતી જોઈ અથવા ચોરી તે સ્પષ્ટ નથી . પરંતુ ઈમેઈલ સરનામાં , ફોન નંબર , જન્મ તારીખ , ફોટા , વિડીયો , સ્ટોરીઝ , ડાયરેક્ટ મેસેજ અને અન્ય વ્યક્તિગત માહિતી જોખમમાં આવી હોઈ શકે છે .

ખામી સામે આવ્યા પછી મેટાએ HTS સિસ્ટમને તાત્કાલિક બંધ કરી દીધી છે . કંપનીએ બધા પાસવર્ડ રીસેટ લિંક્સ રદ કરી છે અને અસરગ્રસ્ત યુઝર્સ માટે વધારાની સુરક્ષા વ્યવસ્થા લાગુ કરી છે . મેટાનું કહેવું છે કે સુરક્ષા વધુ મજબૂત બનાવ્યા પછી જ આ સિસ્ટમ ફરી શરૂ કરવામાં આવશે .