Facebook , Instagram અને TikTok પર સગીરો માટે કડક નિયમો , મલેશિયામાં ઉંમર ચકાસણી ફરજિયાત

તાજેતરના વર્ષોમાં બાળકો પર સોશિયલ મીડિયાની વધતી અસરને લઈને વિશ્વભરમાં ચિંતા વધી રહી છે . આ સમસ્યાને ધ્યાનમાં રાખીને અનેક દેશો  સગીર બાળકો માટે સોશિયલ મીડિયા ઉપયોગ પર નિયંત્રણો મૂકી  રહ્યા છે . હવે મલેશિયાએ પણ આ દિશામાં મહત્વપૂર્ણ પગલું  ભર્યું છે . સોમવારથી  દેશમાં 16 વર્ષથી ઓછી ઉંમરના બાળકો માટે  સોશિયલ મીડિયા પર પ્રતિબંધ અમલમાં આવ્યો છે . નવા નિયમો મુજબ સોશિયલ મીડિયા કંપનીઓએ ઉંમર ચકાસણી સિસ્ટમ લાગુ કરવી પડશે  અને 16 વર્ષથી ઓછી ઉંમરના બાળકોને નવા એકાઉન્ટ બનાવવા દેવામાં આવશે નહીં . આ નિયમ Facebook , Instagram , YouTube અને TikTok સહિતના મોટા પ્લેટફોર્મ્સ પર લાગુ પડશે .

નવા નિયમો અનુસાર , મલેશિયામાં કાર્યરત સોશિયલ મીડિયા પ્લેટફોર્મ્સ માટે વય મર્યાદા ચકાસણી સિસ્ટમ લાગુ કરવી ફરજિયાત બનશે . 16 વર્ષથી ઓછી ઉંમરના બાળકો નવા  સોશિયલ મીડિયા એકાઉન્ટ બનાવી શકશે નહીં . આ નિયમ એવા પ્લેટફોર્મ્સ પર લાગુ પડશે , જેમના દેશમાં ઓછામાં ઓછા 80 લાખ યુઝર્સ  છે . તેમાં Facebook , Instagram , YouTube અને TikTok  જેવા લોકપ્રિય પ્લેટફોર્મ્સનો સમાવેશ થાય છે .

સરકારે સ્પષ્ટ કર્યું છે કે આ નિયમોનું પાલન ન કરનારી કંપનીઓ સામે કડક કાર્યવાહી કરવામાં આવશે . નિયમોના ઉલ્લંઘન બદલ સંબંધિત કંપનીઓને 10 મિલિયન  રિંગિટ (લગભગ 2.5 મિલિયન ડોલર ) સુધીનો દંડ ફટકારવામાં આવી શકે છે . જોકે બાળકો અથવા તેમના માતા - પિતાને કોઈ દંડ કરવામાં આવશે નહીં .

મલેશિયાની સરકારના જણાવ્યા મુજબ , આ નિર્ણયનો મુખ્ય હેતુ બાળકોને હાનિકારક ઓનલાઇન , સાયબર બુલિંગ અને અન્ય ડિજિટલ જોખમોથી  સુરક્ષિત  રાખવાનો છે . સરકારનું માનવું છે કે સોશિયલ મીડિયા પર વધતા જોખમોને ધ્યાનમાં રાખીને બાળકો માટે વધુ  સુરક્ષિત ઓનલાઈન વાતાવરણ બનાવવું જરૂરી છે .

મલેશિયા પહેલાં ઓસ્ટ્રેલિયા , બ્રાઝિલ અને ઇન્ડોનેશિયા જેવા દેશો પણ બાળકોના સોશિયલ મીડિયા ઉપયોગ પર ઉંમર આધારિત નિયંત્રણો લાગુ કરી ચૂક્યા છે . જયારે ફ્રાન્સ , સ્પેન , ડેનમાર્ક , થાઈલેન્ડ , દક્ષિણ કોરિયા અને યુકે જેવા દેશોમાં પણ આવા નિયમો અંગે વિચારી રહી છે .

મલેશિયન કમ્યુનિકેશન્સ એન્ડ મલ્ટીમીડિયા કમિશને જણાવ્યું છે કે આ નિયમોનો મુખ્ય હેતુ બાળકોને ઈન્ટરનેટ અથવા ડિજિટલ ટેક્નોલોજીથી દૂર રાખવાનો નથી પરંતુ  તેમને વધુ સુરક્ષિત ઓનલાઈન અનુભવ પ્રદાન કરવાનો છે . આ માટે સોશિયલ મીડિયા કંપનીઓએ વય મર્યાદા સુરક્ષા વ્યવસ્થાઓ  અને જોખમ વ્યવસ્થાપન સિસ્ટમ્સ વિકસાવવી પડશે .

આ દરમિયાન ભારતમાં પણ સગીર બાળકોના સોશિયલ મીડિયા ઉપયોગને  લઈને ચર્ચા તેજ બની છે . નવા અહેવાલો અનુસાર , કેન્દ્ર સરકાર સોશિયલ મીડિયા  માટે વય - આધારિત મર્યાદાઓ લાગુ કરવાની સંભાવનાઓ પર વિચાર કરી રહી છે .