કેસરથી રાજાપુરી સુધીની કેરીનો જામ્યો જાદુ , ઉનાળામાં ગુજરાતીઓએ મનભરીને માણ્યો સ્વાદ

ગુજરાતમાં ઉનાળાની ઋતુ  એટલે  કેરીની સીઝન . આ વર્ષે પણ રાજ્યના મોટાભાગના શહેરો અને ગામોમાં કેરીનો જબરદસ્ત ક્રેઝ જોવા મળ્યો . એપ્રિલથી શરૂ થયેલી સીઝન દરમિયાન બજારોમાં વિવિધ જાતોની કેરી ઉપલબ્ધ રહી , જેના કારણે ગ્રાહકોએ આખી સીઝન દરમિયાન મનભરીને કેરીનો સ્વાદ માણ્યો . ખાસ કરીને ગીર વિસ્તારની કેસર કેરી ગ્રાહકોની પ્રથમ પસંદ રહી . આ ઉપરાંત રાજાપુરી , લંગડા , દશેરી અને હાફુસ જેવી કેરીની માંગ પણ સારી જોવા મળી છે . ફળ બજારો , રસ્તા કિનારાના સ્ટોલ , કૃષિ બજારો અને સુપરમાર્કેટ ઉપરાંત ઓનલાઇન પ્લેટફોર્મ પર પણ કેરીની ખરીદીમાં વધારો નોંધાયો . ઉનાળાની રજાઓ દરમિયાન પરિવારો દ્રારા મોટા પ્રમાણમાં કેરીની ખરીદી થતા વેપારમાં સતત તેજી જોવા મળી .

વેપારીઓના જણાવ્યા મુજબ , આ વર્ષે શરૂઆતમાં ભાવ થોડા ઊંચા રહ્યા હતા , પરંતુ બજારમાં આવક વધતા ભાવ સામાન્ય બન્યા . જેના કારણે મધ્યમવર્ગીય પરિવારો પણ સરળતાથી કેરી ખરીદી શક્યા  . અનેક પરિવારોમાં રસ , મિલ્કશેક , આઈસ્ક્રીમ , શેક અને આમરસ બનાવવા માટે મોટી માત્રામાં  કેરીની ખરીદી કરવામાં આવી . 

બાગાયત સાથે જોડાયેલા જાણકારોનું માનવું છે કે અનુકૂળ હવામાન , સમયસર વરસાદ અને ખેડૂતોની મહેનતને કારણે આ વર્ષે કેરીની ગુણવત્તા સારી રહી છે . સ્થાનિક બજારો ઉપરાંત અન્ય રાજ્યોમાં પણ ગુજરાતની કેરીની માંગ યથાવત રહી , જેના કારણે ખેડૂતોને યોગ્ય ભાવ મળવામાં મદદ મળી . વેપારીઓના જણાવ્યા પ્રમાણે ગુણવત્તાયુક્ત કેરી માટે ગ્રાહકો વધુ કિંમત ચૂકવવા પણ તૈયાર જોવા મળ્યા .

આ વર્ષે કેરીના વેચાણ સાથે કેરીથી બનતી વિવિધ પ્રોડક્ટ્સ જેવી કે આમરસ , પલ્પ , જ્યુસ , અથાણાં અને મીઠાઈઓની માંગમાં પણ વધારો નોંધાયો . શહેરોમાં અનેક સ્થળોએ મેંગો ફેસ્ટિવલનું આયોજન કરવામાં આવ્યું છે , જ્યાં વિવિધ જાતોની કેરી અને તેમાંથી બનતી વાનગીઓ લોકોના આકર્ષણનું કેન્દ્ર બની છે .

રાજ્યમાં કેરીનું ઉત્પાદન અને વેચાણ દર વર્ષે વિસ્તાર તથા હવામાનના આધારે બદલતું રહે છે . તેમ છતાં આ સિઝનમાં બજારોમાં ગ્રાહકોની સતત અવરજવર અને વેપારમાં જોવા મળેલી તેજી પરથી સ્પષ્ટ થાય છે કે ગુજરાતીઓએ આ વર્ષે પણ કેરીની સિઝનનો ભરપૂર આંનદ લીધો . ઉનાળાની આ મીઠી ઓળખે ફરી એકવાર ખેડૂતો , વેપારીઓ અને ગ્રાહકો ત્રણેયના ચહેરા પર સંતોષનું સ્મિત લાવ્યું .