ઓસ્ટ્રેલિયાનો સોશિયલ મીડિયા કાયદો દુનિયા માટે પ્રેરણારૂપ , PM મોદીએ ગણાવ્યો મહત્વપૂર્ણ

ભારતના વડાપ્રધાન નરેન્દ્ર મોદીએ ઓસ્ટ્રેલિયાની મુલાકાત દરમિયાન 16 વર્ષથી ઓછી ઉંમરના બાળકો માટે લાગુ કરવામાં આવેલા સોશિયલ મીડિયા પ્રતિબંધના કાયદાની પ્રશંસા કરી હતી . તેમણે જણાવ્યું છે કે ડિજિટલ યુગમાં બાળકોના હિતને ધ્યાનમાં રાખીને લેવામાં આવેલા આવા નિર્ણયો સમગ્ર વિશ્વ માટે પ્રેરણાદાયક છે . તેમના જણાવ્યા અનુસાર ભારત સહિત અનેક દેશો ઓસ્ટ્રેલિયાના આ અનુભવમાંથી મહત્વપૂર્ણ પાઠ શીખી શકે છે .

મેલબર્નમાં યોજાયેલી ઓસ્ટ્રેલિયા - ભારત વાર્ષિક લીડર્સ સમિટ દરમિયાન પોતાના સંબોધનમાં વડાપ્રધાને કહ્યું કે ઓસ્ટ્રેલિયા માહિતી પ્રૌધોગિકી અને સોશિયલ મીડિયા સંબંધિત કાયદાઓમાં જે સુધારા કરી રહ્યું છે તે સમાજને વધુ સુરક્ષિત બનાવવાના પ્રયાસો છે . તેમણે ઓસ્ટ્રેલિયાના વડાપ્રધાન એન્થની અલ્બાનીઝ સહિતના નેતાઓની કામગીરીની પ્રશંસા કરતાં કહ્યું કે યુવાનોને સુરક્ષિત રાખવા માટે લેવામાં આવેલા આવા પગલાં અન્ય દેશો માટે પણ માર્ગદર્શક બની શકે છે .

ઓસ્ટ્રેલિયાએ ગયા વર્ષે ડિસેમ્બરથી 16 વર્ષથી ઓછી ઉંમરના બાળકો માટે સોશિયલ મીડિયા ઉપયોગ પર સત્તાવાર પ્રતિબંધ લાગુ કર્યો હતો . આ નિયમ હેઠળ ફેસબુક , ઇન્સ્ટાગ્રામ , યુટયુબ , એક્સ , રેડિટ , ટિક્ટોક અને સ્નેપચેટ જેવા પ્લેટફોર્મ પર નાબાલીગો નવા એકાઉન્ટ બનાવી શકતા નથી . આ પ્રકારનો કાયદો અમલમાં મૂકનાર ઓસ્ટ્રેલિયા વિશ્વનો પ્રથમ દેશ બન્યો છે . સરકારનું માનવું છે કે આ પગલાંથી બાળકોને વધુ સુરક્ષિત અને સંતુલિત બાળપણ જીવવાની તક મળશે તેમજ માતા - પિતાને પણ વધુ વિશ્વાસ મળશે .

આ કાયદા મુજબ સોશિયલ મીડિયા કંપનીઓ માટે વય ચકાસણી ફરજિયાત બનાવવામાં આવી છે . નિયમોનું પાલન ન કરનાર કંપનીઓ પર લગભગ 33 મિલિયન અમેરિકન ડોલર સુધીનો દંડ થઈ શકે છે . આ જવાબદારી બાળકો કે માતા - પિતાની નહીં પરંતુ સોશિયલ મીડિયા પ્લેટફોર્મની રહેશે .

નિષ્ણાતોના મત મુજબ આ નીતિથી બાળકોના માનસિક સ્વાસ્થ્ય , ઊંઘની ગુણવત્તા અને સામાજિક વિકાસને પ્રોત્સાહન મળશે . સાથે જ હાનિકારક ઓનલાઈન સામગ્રી , સાયબર જોખમો અને સોશિયલ મીડિયા પર વધતી નિર્ભરતા જેવી સમસ્યાઓમાં પણ ઘટાડો થવાની આશા વ્યક્ત કરવામાં આવી રહી છે . તેથી ઓસ્ટ્રેલિયાનું આ મોડેલ હવે અન્ય દેશો માટે પણ ચર્ચાનો મહત્વપૂર્ણ વિષય બન્યું છે .