ઓનલાઈન સુરક્ષા પર ભાર : બ્રિટન અને મલેશિયાએ બાળકોના સોશિયલ મીડિયા ઉપયોગ પર લગામ કસી

વિશ્વભરમાં સોશિયલ મીડિયાનો ઉપયોગ સતત વધી રહ્યો છે , પરંતુ તેની સાથે બાળકોની માનસિક અને ઓનલાઈન સુરક્ષા અંગેની ચિંતાઓ પણ વધતી રહી છે . આ કારણસર અનેક દેશો હવે બાળકો માટે સોશિયલ મીડિયા પર નિયંત્રણ લાદવા તરફ આગળ વધી રહ્યા છે . ઓસ્ટ્રેલિયા અને ઈન્ડોનેશિયા બાદ હવે બ્રિટન પણ આ દિશામાં મહત્વપૂર્ણ નિર્ણય લીધો છે . બ્રિટનના વડા પ્રધાન કીર સ્ટાર્મરે 16 વર્ષથી ઓછી ઉંમરના બાળકો માટે સોશિયલ મીડિયા ઉપયોગ પર કડક નિયંત્રણો લાવવાની જાહેરાત કરી છે .

આ નિયમો ફેસબુક , ઈન્સ્ટાગ્રામ , યુટ્યુબ , ટિક્ટોક , સ્નેપચેટ અને એક્સ જેવા લોકપ્રિય પ્લેટફોર્મ્સને આવરી લેવામાં આવી શકે છે . જોકે , વોટ્સએપ અને સિગ્નલ જેવી મેસેજિંગ એપ્સને આ નિયમોમાંથી છૂટ આપવામાં આવી શકે છે .

સરકારનો ઉદ્દેશ્ય બાળકોને ઓનલાઈન જોખમોથી બચાવવાનો છે . નવા નિયમો હેઠળ 16 વર્ષથી ઓછી ઉંમરના યુઝર્સ માટે લાઈવસ્ટ્રીમિંગ અને અજાણ્યા લોકો સાથે સીધી વાતચીત જેવી સુવિધાઓ પર પ્રતિબંધ મુકવામાં આવી શકે છે . સ્ટાર્મરના જણાવ્યા અનુસાર સોશિયલ મીડિયા બાળકોમાં વધતી માનસિક અસ્વસ્થતા અને અસંતોષ માટે જવાબદાર બની રહ્યું છે , કારણ કે ઘણા પ્લેટફોર્મ્સ યુઝર્સને લાંબા સમય સુધી જોડાયેલા રાખવા માટે ડિઝાઈન કરવામાં આવ્યા છે .

આ દરમિયાન મલેશિયા એ પણ બાળકો માટે સોશિયલ મીડિયા ઉપયોગ પર નિયંત્રણ લાવવાનો નિર્ણય કર્યો છે . નવા નિયમો મુજબ સોશિયલ મીડિયા કંપનીઓએ ઉંમર તપાસવાની વ્યવસ્થા ફરજિયાત બનાવવી પડશે . 16 વર્ષથી ઓછી ઉંમરના બાળકોને નવા એકાઉન્ટ બનાવવાની મંજૂરી નહીં મળે . આ નિયમ ઓછામાં ઓછા 80 લાખ યુઝર્સ ધરાવતા પ્લેટફોર્મ્સ પર લાગુ પડશે .

નિયમોનું પાલન ન કરતી કંપનીઓ સામે કડક કાર્યવાહી કરવામાં આવશે અને તેમને 10 મિલિયન રિંગિટ ( લગભગ 25 લાખ ડોલર ) સુધીનો દંડ થઈ શકે છે . મલેશિયા સરકારે જણાવ્યું છે કે આ પગલાનો મુખ્ય હેતુ બાળકોને હાનિકારક સાયબર બુલિંગ અને અન્ય ઓનલાઈન જોખમોથી સુરક્ષિત રાખવાનો છે . ફ્રાન્સ , સ્પેન , ડેનમાર્ક , થાઈલેન્ડ અને દક્ષિણ કોરિયા સહિતના અનેક દેશો પણ આવા જ નિયમો અમલમાં મુકવાની સંભાવનાઓ પર વિચાર કરી રહ્યા છે .