Instagram ' Your Algorithm ' ફીચર વિસ્તારે છે , ફીડમાં દેખાતી સામગ્રી કરી શકશો કસ્ટમાઇઝ

ઇન્સ્ટાગ્રામ ટૂંક જ સમયમાં એક નવી સુવિધા લાવવા જઈ રહ્યું છે , જેનાથી યુઝર્સ પ્લેટફોર્મ પર તેમને ક્યાં પ્રકારના કન્ટેન્ટ દેખાય છે તેના પર વધુ નિયંત્રણ મેળવી શકશે . મેટાની માલિકી ધરાવતી આ સોશિયલ મીડિયા પ્લેટફોર્મ તેની " યોર અલ્ગોરિધમ " સુવિધાનો વિસ્તાર વધારવાની જાહેરાત કરી છે . આ સુવિધા યુઝર્સને બતાવશે કે ઇન્સ્ટાગ્રામ તેમની કઈ - કઈ પસંદને ઓળખે છે અને તેના આધારે ક્યાં વિષયોની પોસ્ટ્સ અને વિડીયો તેમને બતાવે છે .

ઇન્સ્ટાગ્રામના વડા એડમ મોસેરીએ જણાવ્યું કે આ નવી સુવિધા દ્રારા યુઝર્સ પોતાના મુખ્ય ફીડમાં દેખાતા કન્ટેન્ટને વધુ સારી રીતે કસ્ટમાઇઝ કરી શકશે . હાલમાં આ ફીચર માત્ર વિષયોની માહિતી આપશે , પરંતુ ભવિષ્યમાં તેમાં લોકો , કન્ટેન્ટના પ્રકાર , મૂડ અને અન્ય પસંદગીઓ પણ સામેલ કરવામાં  આવી છે .

કંપની છેલ્લા કેટલાક સમયથી યુઝર્સને અલ્ગોરિધમ પર વધુ નિયંત્રણ આપવા માટે પ્રયાસ કરી રહી છે . પહેલા " યોર અલ્ગોરિધમ " સુવિધા ફક્ત રીલ્સ અને એક્સપ્લોર પેજ માટે ઉપલબ્ધ હતી . હવે તેને મુખ્ય ફીડ સુધી પણ વિસ્તૃત કરવામાં આવી રહી છે , જેથી લોકો પોતાની પસંદગી પ્રમાણે વધુ યોગ્ય કન્ટેન્ટ જોઈ શકે .

મોસેરીના જણાવ્યા અનુસાર , સોશિયલ મીડિયા અલ્ગોરિધમ્સ  હવે ખૂબ જ સ્માર્ટ બની ગયા છે , પરંતુ તેની સાથે યુઝર્સનું નિયંત્રણ થોડું ઓછું થયું છે . હાલમાં સિસ્ટમ યુઝરના લાઈક , વ્યુ , શેર અને અન્ય પ્રવૃતિઓના આધારે તેમની પસંદગીઓ સમજે છે . જોકે , લોકો પાસે સીધું જણાવવાનો વિકલ્પ નથી કે તેઓ ખરેખર શું જોવા માંગે છે .

ઇન્સ્ટાગ્રામ માને છે કે આ જ કારણથી ઘણા લોકો ક્યારેક સોશિયલ મીડિયા અનુભવથી અસંતોષ અનુભવે છે નવી સુવિધાનો મુખ્ય ઉદ્દેશ્ય યુઝર્સને વધુ પારદર્શિતા અને નિયંત્રણ આપવાનો છે . કંપનીનું માનવું છે કે લોકો માત્ર અલ્ગોરિધમ પર નિર્ભર ન રહે , પરંતુ તેઓ પોતે પણ નક્કી કરી શકે કે તેમના ફીડમાં ક્યા પ્રકારના  કન્ટેન્ટ વધુ જોવા મળે .

એલએલએમ ( Large Language Models ) ટેક્નોલોજીની મદદથી ઇન્સ્ટાગ્રામ હવે યુઝર્સની પસંદને સરળ ભાષામાં સમજાવી શકશે , જેથી લોકો જરૂર મુજબ  તેમાં ફેરફાર પણ કરી શકે .