કાળા વાદળો , આંધી વરસાદથી ગુજરાતનું વાતાવરણ બદલાયું , અનેક જિલ્લાઓ પ્રભાવિત

અમદાવાદમાં સોમવારે સાંજે હવામાનમાં અચાનક મોટો ફેરફાર જોવા મળ્યો હતો . દિવસભર કાળઝાળ ગરમી અને ઉકળાટ બાદ શહેરના અનેક વિસ્તારોમાં ધૂળભરી આંધી , તેજ પવન અને છુટાછવાયા વરસાદે લોકોને રાહત આપી હતી . જોકે કેટલાક વિસ્તારોમાં પવનની ગતિ વધતા ટ્રાફિક અને દૈનિક જનજીવન  પણ  અસર જોવા મળી હતી . માત્ર અમદાવાદ જ નહીં પરંતુ બીજા અનેક જિલ્લાઓમાં  પણ મોસમમાં ફેરફાર જોવા મળ્યો હતો , જોકે હજુ સુધી આંધી અને તેજ પવનના કારણે કોઈ પણ નુકસાનની નોંધણી થઈ નથી .

હવામાન વિભાગે પહેલાથી જ અમદાવાદ સહિત ગુજરાતના અનેક જિલ્લાઓમાં પ્રી - મોન્સૂન સક્રિય થવાની આગાહી કરી હતી . મોસમ વિભાગના જણાવ્યા  અનુસાર  રાજ્યના જુદા જુદા વિસ્તારોમાં ગાજવીજ , વીજળીના કડાકા અને 40 થી 50 કિલોમીટર પ્રતિ કલાકની ઝડપે પવન ફૂંકાવાની શક્યતા વ્યક્ત કરવામાં આવી હતી .

માત્ર અમદાવાદ જ નહીં , પરંતુ ઉત્તર ગુજરાત , મધ્ય ગુજરાત અને સૌરાષ્ટ્રના કેટલાક વિસ્તારોમાં પણ હવામાનમાં નોંધપાત્ર ફેરફાર જોવા મળ્યો હતો . બનાસકાંઠા  , પાટણ , મહેસાણા , સાબરકાંઠા , અરવલ્લી અને કચ્છના કેટલાક વિસ્તારોમાં વાદળછાયું વાતાવરણ અને વરસાદી ઝાપટાં નોંધાયા હતા . આ ઉપરાંત રાજકોટ , જામનગર , મોરબી અને દ્રારકા સહિતના વિસ્તારોમાં પણ વરસાદી માહોલ સર્જાયો હતો .

અમદાવાદમાં સાંજના સમયે કાળા વાદળો છવાઈ જતાં વાતાવરણમાં ઠંડક પ્રસરી ગઈ હતી . ઘણા વિસ્તારોમાં  ડમરીઓ ઉડી હતી , જયારે કેટલાક વિસ્તારોમાં  હળવા વરસાદે ગરમીનો પારો નીચે લાવી દીધો હતો . છેલ્લા ઘણા દિવસોથી 40 ડિગ્રી સેલ્સિયસથી વધુ તાપમાનનો સામનો કરી રહેલા નાગરિકોને  આ બદલાયેલા હવામાનથી મોટી રાહત મળી હતી .

હવામાન નિષ્ણાંતોના અનુસાર આ પ્રિ - મોન્સૂન પ્રવૃત્તિ આવનારા કેટલાક દિવસો સુધી યથાવત રહી શકે છે . ગુજરાતમાં દક્ષિણ - પશ્ચિમ ચોમાસાના  આગમન પહેલા  આવા પવન , ગાજવીજ અને છુટાછવાયા વરસાદની ઘટનાઓ સામાન્ય માનવામાં આવે છે . આગામી દિવસોમાં પણ રાજ્યના અનેક વિસ્તારોમાં  વરસાદી માહોલ રહેવાની શક્યતા હોવાથી લોકોને સાવચેતી રાખવા અને હવામાન વિભાગની સૂચનાઓ પર ધ્યાન આપવા સલાહ આપવામાં આવી છે .