ગુંટુરમાં અનોખી સર્જરી : ફિલ્મ જોતી મહિલાના મગજની ગાંઠ સફળતાપૂર્વક દૂર

આંધ્રપ્રદેશના ગુંટુર જિલ્લામાં એક દુર્લભ અને અદ્યતન તબીબી પ્રક્રિયા સફળતાપૂર્વક પૂર્ણ કરવામાં આવી છે . એક ખાનગી હોસ્પિટલના ડોક્ટરોએ મહિલાની મગજની ગાંઠ દૂર કરવાની સર્જરી ત્યારે કરી જયારે તે સંપૂર્ણપણે જાગતી હતી અને પોતાના પ્રિય અભિનેતા તથા આંધ્રપ્રદેશના નાયબ મુખ્યમંત્રી પવન કલ્યાણની ફિલ્મ " OG " ના દ્રશ્યો જોઈ રહી હતી . ન્યુરોસર્જન ડૉ . અરુણ કુમાર અને તેમની ટીમે આ જટિલ સર્જરી સફળતાપૂર્વક પાર પાડી હતી .

પ્રકાશમ જિલ્લાના રહેવાસી કોટેશ્વરમ્માને મગજની ગાંઠ સંબંધિત તકલીફો બાદ સારવાર માટે હોસ્પિટલમાં દાખલ કરવામાં આવ્યા હતા . જુદા જુદા સ્કેન અને તબીબી તપાસ બાદ ડોક્ટરોએ ' અવેક બ્રેઈન સર્જરી ' ( જાગૃત મગજ સર્જરી ) કરવાનો નિર્ણય લીધો . ગાંઠ મગજના એવા ભાગની નજીક હતી , જે બોલવાની અને શરીરની હલચલ જેવી મહત્વપૂર્ણ ક્રિયાઓને નિયંત્રિત કરે છે .

ન્યુરોસર્જન ડૉ . અરુણ કુમાર અને તેમની ટીમે આ જટિલ સર્જરી સફળતાપૂર્વક પાર પાડી હતી . ડોક્ટરોએ જણાવ્યું કે અવેક બ્રેઈન સર્જરી દરમિયાન દર્દી સર્જરી કરતી વખતે જાગૃત રહે છે , જેથી બોલવાની , યાદશક્તિ અને મોટર કાર્યનું સતત નિરીક્ષણ કરી શકાય . આ પદ્ધતિ મગજના મહત્વપૂર્ણ ભાગોને  સુરક્ષિત રાખવામાં મદદરૂપ બને છે .

સર્જરી દરમિયાન કોટેશ્વરમ્મા તબીબી ટીમના સવાલોના જવાબ આપી શકતા હતા , વાતચીત કરી શકતા હતા અને સાથે ફિલ્મ પણ જોઈ રહ્યા હતા . ડોક્ટરોના જણાવ્યા અનુસાર , ફિલ્મના દ્રશ્યોએ તેમની ચિંતા ઘટાડવામાં અને તેમને શાંત તથા સહકારી રાખવામાં મહત્વની ભૂમિકા ભજવી હતી .

એનેસ્થેટિસ્ટ ડૉ . રાજશેખરે જણાવ્યું કે દર્દી પવન કલ્યાણના મોટા પ્રશંસક હોવાથી ' ઓજી ' ના દ્રશ્યો દર્શવવામાં આવ્યા હતા . તેના કારણે દર્દી આરામદાયક અનુભવતા રહ્યા અને સર્જરી દરમિયાન મળતા તેમના અભિપ્રાયોથી મગજની કાર્યક્ષમતાનું રિયલ - ટાઈમ મૂલ્યાંકન કરવામાં મદદ મળી .

હોસ્પિટલના જણાવ્યા અનુસાર , ગાંઠને કોઈપણ તકલીફ વિના સફળતાપૂર્વક દૂર કરવામાં આવી છે અને દર્દી હાલમાં સારી રીતે સ્વસ્થ થઈ રહ્યા છે . તબીબી નિષ્ણાંતોનું  માનવું છે કે જટિલ મગજની ગાંઠોની સારવારમાં અવેક ક્રેનિયોટોમી જેવી પદ્ધતિઓ વધુ અસરકારક સાબિત થઈ રહી છે , કારણ કે તે ગાંઠને સુરક્ષિત રીતે દૂર કરવાની સાથે મગજના મહત્વપૂર્ણ કાર્યોને નુકસાન થવાનું જોખમ પણ ઘટાડે છે .