6 મિનિટથી વધુ સમય સુધી અંધકાર સર્જાશે 2027નું દુર્લભ સૂર્યગ્રહણ

જો તમને ખગોળીય ઘટનાઓમાં રસ હોય , તો આવનારા થોડા વર્ષો તમારા માટે ખુબ જ રોમાંચક સાબિત થવાના છે . વર્ષ 2026 થી 2028 દરમિયાન દુનિયા સતત ત્રણ પૂર્ણ સૂર્યગ્રહણ જોવા મળશે . જોકે , સૌથી વધુ ચર્ચામાં 2 ઓગસ્ટ , 2027 ના રોજ થનારું સૂર્યગ્રહણ રહેશે , નાસાના જણાવ્યા અનુસાર , આ 21મી સદીનું સૌથી લાબું પૂર્ણ સૂર્યગ્રહણ બનશે . આ દરમિયાન ચન્દ્ર લગભગ 6 મિનિટ અને 23 સેકન્ડ સુધી સૂર્યને સંપૂર્ણપણે ઢાંકી દેશે , જેના કારણે દિવસ  દરમિયાન થોડા સમય માટે અંધકારમય વાતાવરણ સર્જાશે . આ દુર્લભ ખગોળીય ઘટના દક્ષિણ સ્પેન, ઉત્તર આફ્રિકા અને મધ્ય પૂર્વના અનેક વિસ્તારોમાં સ્પષ્ટ રીતે જોવા મળશે .

આ પહેલા 12 ઓગસ્ટ , 2026ના રોજ પણ પૂર્ણ સૂર્યગ્રહણ જોવા મળશે , પરંતુ વૈજ્ઞાનિકો અને ખગોળપ્રેમીઓનું ખાસ ધ્યાન 2027 ના ગ્રહણ પર કેન્દ્રિત છે . નાસાની ગણતરી મુજબ , આટલા લાંબા સમય સુધી ચાલનાર છેલ્લું પૂર્ણ સૂર્યગ્રહણ વર્ષ 1991 માં જોવા મળ્યું હતું , જયારે આવું દુર્લભ દ્રશ્ય હવે સીધું 2114માં જોવા  મળશે .

અમેરિકન સાયન્સ ફાઉન્ડેશનના જણાવ્યા પ્રમાણે , 2 ઓગસ્ટ , 2027 નું સૂર્યગ્રહણ દક્ષિણ સ્પેનથી શરૂ ઉત્તર આફ્રિકા અને મધ્ય પૂર્વ સુધી જોવા મળશે . ટ્યુનિશિયા અને ઇજિપ્ત એવા દેશોમાં સામેલ છે જ્યાં આ ગ્રહણ સૌથી વધુ સ્પષ્ટ અને લાંબા સમય સુધી જોવા મળશે . 

વૈજ્ઞાનિકોના કહેવા પ્રમાણે , આ ગ્રહણ લાબું ચાલવાનું મુખ્ય કારણ ચંદ્રની સ્થિતિ છે . જયારે ચંદ્ર પૃથ્વી અને સૂર્યની  વચ્ચે આવે છે ત્યારે સૂર્યગ્રહણ સર્જાય છે . 2 ઓગસ્ટ , 2027 ના રોજ ચંદ્ર પૃથ્વીની ખુબ નજીક હશે , જેના કારણે તે આકાશમાં વધુ મોટો દેખાશે અને લાંબા સમય સુધી સૂર્યને સંપૂર્ણપણે ઢાંકી શકશે .

આ ઉપરાંત , ગ્રહણનો મુખ્ય માર્ગ એવા વિસ્તારોમાંથી પસાર થશે જ્યાં સૂર્ય આકાશમાં વધુ ઉંચાઈએ હશે . આ કારણે પૂર્ણ ગ્રહણનો સમય થોડો વધુ લંબાશે . નાસાના જણાવ્યા મુજબ , આ દરમિયાન લોકો સૌર કોરોનાનું અત્યંત દુર્લભ અને સ્પષ્ટ દ્રશ્ય પણ જોઈ શકાશે , જે સામાન્ય દિવસોમાં નજરે પડતું નથી .