જીઓ 5G સ્પીડમાં ટોચે, એરટેલ શ્રેષ્ઠ 5G ગેમિંગ માટે પસંદ

વર્ષ 2024ના બીજા ભાગ (H2 2024) દરમિયાન, રિલાયન્સ જિયોએ નેટવર્ક સ્પીડ અને કવરેજમાં ભારતીય માર્કેટમાં આગળ રહીને પોતાનું પ્રભુત્વ સાબિત કર્યું. માર્કેટ એનાલિસિસ અનુસાર, જીઓના 73.7% યુઝર્સને સતત 5G નેટવર્ક ઉપલબ્ધ રહ્યું, જે ઇન્ડસ્ટ્રીમાં સૌથી ઊંચું હતું. Ookla ના સ્પીડટેસ્ટ કનેક્ટિવિટી રિપોર્ટ મુજબ, જીઓ એ 174.89નો સૌથી ઊંચો સ્પીડ સ્કોર મેળવ્યો. કંપનીએ તમામ ટેક્નોલોજી સાથે 158.63 Mbpsની મિડિયન ડાઉનલોડ સ્પીડ હાંસલ કરી, જ્યારે એરટેલ 100.67 Mbps સાથે બીજા ક્રમે અને Vi 21.60 Mbps સાથે ત્રીજા ક્રમે રહ્યું.જીઓએ 5Gમાં સ્પીડ અને કવરેજમાં લીડ મેળવી,5G નેટવર્ક સ્પીડના મુદ્દે પણ જીઓ આગળ રહ્યું. કંપનીએ 258.54 Mbps મિડિયન 5G ડાઉનલોડ સ્પીડ અને 55 ms લેટન્સી નોંધાવી. એરટેલ 205.1 Mbps સાથે બીજા સ્થાને રહ્યું, જ્યારે Vi તાજેતરમાં જ 5G લોન્ચ કરવાને કારણે રેન્કિંગમાંથી બહાર રહ્યું. જીઓએ 65.66નો કવરેજ સ્કોર મેળવી શ્રેષ્ઠ કવરેજ આપ્યું, જ્યારે એરટેલ 58.17 સાથે બીજા ક્રમે રહ્યું.

એરટેલે શ્રેષ્ઠ 5G ગેમિંગ અને વિડીયો સ્ટ્રીમિંગ આપ્યું

જીઓએ સ્પીડ અને કવરેજમાં લીડ મેળવ્યા હોવા છતાં, એરટેલ શ્રેષ્ઠ 5G ગેમિંગ અનુભવ આપતો નેટવર્ક સાબિત થયું. રિપોર્ટ અનુસાર, એરટેલનો 5G ગેમ સ્કોર 80.17 રહ્યો. એરટેલને 65.73 સ્કોર સાથે ભારતનું શ્રેષ્ઠ વિડીયો સ્ટ્રીમિંગ નેટવર્ક પણ જાહેર કરવામાં આવ્યું.

યૂઝર રેટિંગમાં એરટેલ પ્રથમ સ્થાને

Speedtest યુઝર્સ રેટિંગ મુજબ, એરટેલ 3.45 સ્કોર સાથે ભારતનું ટોચનું મોબાઇલ પ્રોવાઇડર બન્યું, જ્યારે BSNL 3.34 સાથે બીજા અને જીઓ 3.27 સાથે ત્રીજા સ્થાને રહ્યું.

ભારતનું સૌથી ઝડપી ISP કયું?

ISP કેટેગરીમાં એક્સાઇટલ સૌથી ઝડપથી વધતું ઇન્ટરનેટ પ્રોવાઇડર સાબિત થયું. કંપનીએ 117.21 Mbps મિડિયન ડાઉનલોડ અને 110.96 Mbps અપલોડ સ્પીડ નોંધાવી.