BSNL - સ્ટારલિંક ભાગીદારીની ચર્ચા વચ્ચે સેવાની મંજૂરી અટકી

સેટેલાઇટ આધારિત ઈન્ટરનેટ સેવા આપનારી સ્ટારલિંકને ભારતમાં કામગીરી શરૂ કરવા માટે જરૂરી અંતિમ મંજૂરી મેળવવામાં વધુ સમય લાગી શકે છે . મીડિયા અહેવાલો મુજબ , મધ્ય પૂર્વમાં ચાલી રહેલા સંઘર્ષના કારણે સ્ટારલિંકના સેટેલાઇટ ટર્મિનલના ઉપયોગને લઈને ઊભી થયેલી સુરક્ષા ચિંતાઓને કારણે આ પ્રક્રિયા ધીમી પડી છે . કંપની છેલ્લા કેટલાક મહિનાથી ભારતીય બજારમાં પ્રવેશ માટે તૈયારીઓ કરી રહી છે . BSNL અને સ્ટારલિંક વચ્ચે સંભવિત ભાગીદારી અંગે ચર્ચાઓ ચાલી રહી છે , પરંતુ હજુ  સુધી કોઈ સત્તાવાર  કરાર થયો નથી .

અહેવાલ મુજબ , ગૃહ મંત્રાલય હેઠળ કાર્યરત સુરક્ષા એજન્સીઓએ સ્ટારલિંકને સેવા શરૂ કરવાની અંતિમ મંજૂરી હાલ માટે અટકાવી રાખી છે . ઈરાનમાં કંપની પાસે સત્તાવાર લાઇસન્સ ન હોવા છતાં પણ ત્યાં સ્ટારલિંક ટર્મિનલ્સના ઉપયોગના અહેવાલો સામે આવ્યા છે . આ ઘટનાએ સંકટના સમયમાં કંપનીની સેવાઓ પર નિયંત્રણ રાખવાની સરકારોની ક્ષમતા ઉપર પ્રશ્નો ઊભા કર્યા છે .

એલોન મસ્કની માલિકીની સ્ટારલિંકને લગભગ એક વર્ષ પહેલાં ભારતમાં ગ્લોબલ મોબાઈલ પર્સનલ કોમ્યુનિકેશન બાય સેટેલાઇટ ( GMPCS ) લાઇસન્સ મળ્યું હતું . જોકે આ લાઇસન્સ માત્ર પ્રાથમિક તૈયારીઓ અને કરારો માટે જ માન્ય છે . વ્યવસાયિક સેવા શરૂ કરવા માટે કંપનીને હજુ કેટલાક નિયમો અને સુરક્ષા સંબંધિત મંજૂરીઓ મેળવવી બાકી છે .

સ્ટારલિંકની મંજૂરીમાં થતો વિલંબ મસ્કની સ્પેસ ટેક્નોલીજી કંપની સ્પેસએક્સના સંભવિત IPO પર પણ અસર કરી શકે છે . ભારતીય સત્તાવાળાઓ છેલ્લા કેટલાક મહિનાઓથી કંપનીના સુરક્ષાની તપાસ કરી રહ્યા છે અને હજુ સુધી અંતિમ સુરક્ષા મંજૂરી આપી નથી .

બીજી તરફ, તાજેતરમાં એવા અહેવાલો પણ સામે આવ્યા છે કે સરકારી ટેલિકોમ કંપની BSNL અને સ્ટારલિંક વચ્ચે ભાગીદારીની સંભાવનાઓ પર ચર્ચા ચાલી રહી છે . દેશના દૂરદરાજ વિસ્તારોમાં ઈન્ટરનેટ કનેક્ટિવિટી વધારવા માટે બંને કંપનીઓ સાથે મળીને કામ કરી શકે છે . ચર્ચામાં સેટેલાઇટ આધારિત ઈન્ટરનેટ સેવાઓ અને એન્ટરપ્રાઇઝ ગ્રાહકોને કનેક્ટિવિટી આપવાની યોજનાનો સમાવેશ થાય છે .

જો કે , આ વાતચીત હજુ તેના પહેલા જ પગલાંમાં છે અને બંને પક્ષો વચ્ચે કોઈ પણ સત્તાવાર કરાર થયો નથી .