1400 અને 1600 નંબર સિરીઝ પર Truecallerનો TRAI સામે ખુલ્લો વિરોધ , સ્પામ કોલ્સ મુદ્દે ઉઠાવ્યા સવાલ

ભારતમાં કોલર આઈડી અને સ્પામ કોલ્સને લઈને Truecaller અને TRAI વચ્ચેનો વિવાદ વધુ તીવ્ર બન્યો છે . Truecallerએ ટેલિકોમ રેગ્યુલેટરી ઓથોરિટી ઓફ ઇન્ડિયા ( TRAI ) ની કેટલીક નીતિઓ સામે જાહેરમાં વાંધો ઉઠાવ્યો છે . કંપનીનું કહેવું છે કે વર્તમાન એન્ટી - સ્પામ વ્યવસ્થાના કારણે ગ્રાહકોને અનિચ્છનીય કોલ્સથી સુરક્ષિત રાખવામાં મુશ્કેલી ઊભી થઈ રહી છે .

Truecallerના CEO ઋષિત ઝુનઝુનવાલાએ સોશિયલ મીડિયા પ્લેટફોર્મ X પર TRAIની નીતિની ખુલ્લેઆમ ટીકા કરી છે . તેમના જણાવ્યા મુજબ , TRAI કંપનીને 1400 અને 1600 નંબર સિરીઝમાંથી આવતી કોલ્સ માટે યુઝર્સ દ્રારા રિપોર્ટ કરાયેલી સ્પામ માહિતી બતાવવાની મંજૂરી આપતું નથી . તેમનું માનવું છે કે આ પ્રતિબંધને કારણે આવા નંબરનો દુરુપયોગ વધી રહ્યો છે અને ગ્રાહકોનો વિશ્વાસ પણ ઘટી રહ્યો છે .

તેમણે કહ્યું છે કે TRAI દ્રારા ઇલેક્ટ્રોનિક્સ અને માહિતી પ્રૌધોગિકી મંત્રાલય પાસે આ નંબર સિરીઝ માટે Caller ID માહિતી ન દર્શવવાની મંજૂરી માંગવાનો નિર્ણય યોગ્ય નહોતો . તેમના મતે , આ પગલાંના કારણે સ્પામ કોલ્સ પર નિયંત્રણ આવવાને બદલે તેમાં વધારો થયો છે .

ઉલ્લેખનીય છે કે વર્ષ 2024માં TRAI એ વ્યાપારી સંચાર માટે નવી વ્યવસ્થા અમલમાં મૂકી હતી . તેના હેઠળ 1400નંબર સિરીઝ ટેલીમાર્કેટિંગ કોલ્સ માટે અને 1600 નંબર સિરીઝ સર્વિસ તેમજ ટ્રાન્ઝેક્શન સંબંધિત કોલ્સ માટે નક્કી કરવામાં આવી હતી . બાદમાં તમામ સંબંધિત સંસ્થાઓ માટે આ નંબર સિરીઝનો ઉપયોગ ફરજિયાત બનાવાયો હતો . TRAIનું માનવું હતું કે આ વ્યવસ્થાથી ગ્રાહકોને સાચા બિઝનેસ કોલ્સ ઓળખવામાં સરળતા રહેશે અને સ્પામ તથા સ્કેમ કોલ્સ સામે રક્ષણ મળશે .

પરંતુ Truecallerનો દાવો છે કે આ નીતિના વિપરીત પરિણામો જોવા મળી રહ્યા છે . કંપનીના જણાવ્યા અનુસાર , છેલ્લા આઠ મહિનામાં તેના યુઝર્સે 1400 સિરીઝમાંથી આવેલી અંદાજે 81 ટકા અને 1600 સિરીઝમાંથી આવેલી લગભગ 79 ટકા કોલ્સને નકારે છે . એટલું જ નહીં , આ સમયગાળા દરમિયાન યુઝર્સે બંને સિરીઝમાંથી આવેલી 7.4 કરોડ કોલ્સને મેન્યુઅલી બ્લોક કરી છે . કંપનીનું કહેવું છે કે ઓક્ટોબર 2025 બાદ 1600 સિરીઝના નંબરને દરરોજ બ્લોક કરવાની સંખ્યામાં ત્રણ ગણાથી વધુ વધારો નોંધાયો છે .