દેશમાં ટેલિકોમ ગ્રાહકો વધીને 134 કરોડને પાર , TRAIના આંકડામાં ખુલાસો

દેશમાં મે મહિનામાં ટેલિકોમ ગ્રાહકોની સંખ્યામાં વધારો નોંધાયો છે . ટેલિકોમ રેગ્યુલેટરી ઓથોરિટી ઓફ ઇન્ડિયા ( TRAI ) ના તાજા અને નવા આંકડા મુજબ , દેશમાં કુલ ટેલિકોમ સબ્સ્ક્રાઇબર્સની સંખ્યા 0.42 ટકા વધીને આશરે 1.343 અબજ થઈ ગઈ છે . નવા ગ્રાહકો ઉમેરવામાં ભારતી એરટેલ સૌથી આગળ રહી છે , જયારે રિલાયન્સ જિયોએ પણ મોટી સંખ્યામાં નવા યુઝર્સ જોડાયા છે . ગયા મહિને દેશમાં બ્રોડબેન્ડ સબ્સ્ક્રાઇબર્સની કુલ સંખ્યા વધીને આશરે 1.08 અબજ થઈ ગઈ .  ટેલિકોમ કંપનીઓએ ફક્ત વોઇસ અને એસએમએસ માટે અલગ , ઓછી કિંમતના પ્લાન રજૂ કરવાનો વિરોધ કર્યો છે .

TRAI ના અહેવાલ મુજબ , ભારતી એરટેલ મે મહિનામાં કુલ 29.8 લાખ નવા ગ્રાહકો એડ કર્યા છે . તેમાં લગભગ 29.26 લાખ મોબાઈલ અને 53,809 ફિક્સ્ડ - લાઈન ગ્રાહકોનો સમાવેશ થાય છે . બીજી તરફ , રિલાયન્સ જિયોએ પણ 22.55 લાખ નવા ગ્રાહકો પોતાના નેટવર્કમાં જોડાયા છે . તેમાં 21.54 લાખ મોબાઈલ અને લગભગ 1.01 લાખ ફિક્સ્ડ - લાઈન ગ્રાહકો સામેલ છે .

આ રીતે એરટેલ અને જિયોએ મળીને મે મહિનામાં 52.36 લાખ નવા ગ્રાહકો ઉમેર્યા છે . દેશમાં વાયરલેસ ક્નેક્શન્સની સંખ્યા પણ વધીને લગભગ 129.44 કરોડ થઈ ગઈ છે . તેમાંથી 114.58 કરોડ ગ્રાહકો મોબાઈલ સિમનો ઉપયોગ કરે છે .

બ્રોડબેન્ડ સબ્સ્ક્રાઇબર્સની સંખ્યા પણ વધીને 108 કરોડ સુધી પહોંચી છે . આ સેગમેન્ટમાં રિલાયન્સ જિયો લગભગ 52.96 કરોડ ગ્રાહકો સાથે પહેલા સ્થાને છે , જયારે ભારતી એરટેલ પાસે લગભગ 37.6 કરોડ બ્રોડબેન્ડ ગ્રાહકો છે .

બીજી તરફ , TRAI એ માત્ર કોલિંગ અને SMS માટે ઓછી કિંમતના પ્લાન લાવવાનો પ્રસ્તાવ મૂક્યો છે . તેનો હેતુ એવા ગ્રાહકોને સસ્તો વિકલ્પ આપવાનો છે , જેમને ડેટાની જરૂર નથી . જોકે , મોટી ટેલિકોમ કંપનીઓએ આ પ્રસ્તાવનો વિરોધ કર્યો છે . કંપનીઓનું માનવું છે કે આવા અલગ પ્લાન રજૂ કરવાથી તેમની હાલની ટેરિફ વ્યવસ્થા પર અસર પડી શકે છે . હાલમાં TRAI આ મુદ્દે મળેલા સૂચનો અને અભિપ્રાયોની તપાસ કરી રહ્યું છે .