JioHotstar માટે JAMS , AI Snapshot અને Multiview લોન્ચ , યુઝર્સને મળશે નવો અનુભવ

રિલાયન્સ ઇન્ડસ્ટ્રીઝ લિમિટેડ ( RIL )એ તેની 49મી વાર્ષિક સામાન્ય સભા ( AGM ) દરમિયાન JioHotstar અને  તેના મીડિયા બિઝનેસ માટે અનેક નવી AI ( આર્ટિફિશિયલ ઇન્ટેલિજન્સ ) આધારિત સુવિધાઓની જાહેરાત કરી છે . કંપનીનું કહેવું છે કે આ નવી પહેલો કન્ટેન્ટ બનાવવાની પ્રક્રિયાને વધુ સરળ બનાવશે અને યુઝર્સને વધુ સારો મનોરંજન અનુભવ આપશે . આ નવી સુવિધાથી કન્ટેન્ટ જોવાનું અને તેનો ઉપયોગ કરવાનો અનુભવ બદલાશે .

AGM દરમિયાન Reliance Jio Infocomm ના ચેરમેન આકાશ અંબાણીએ JioStar GenAI Media Studio ( JAMS ) રજૂ કર્યું . કંપનીના જણાવ્યા મુજબ , આ એક AI આધારિત કન્ટેન્ટ પ્રોડક્શન પ્લેટફોર્મ છે , જે કન્ટેન્ટ ક્રિએટર્સને નવી સ્ટોરી તૈયાર કરવામાં , ફોટો બનાવવા , ઓડિયો જનરેટ કરવા અને વિડીયો બનાવવા જેવી પ્રક્રિયામાં મદદ કરશે . JAMS નો હેતુ કન્ટેન્ટ બનાવવાનો સમય ઘટાડવાનો અને ક્રિએટર્સને વધુ અસરકારક રીતે કામ કરવાની તક આપવાનો છે .

કંપનીએ AI Snapshot નામની નવી સુવિધા પણ રજૂ કરી છે . આ ફીચર યુઝર્સ માટે પર્સનલ રિકેપ તૈયાર કરશે . જો કોઈ યુઝર કોઈ શો , મેચ અથવા કાર્યક્રમનો અમુક ભાગ ચૂકી જાય , તો AI Snapshot તેના મુખ્ય હાઈલાઈટ્સ અને મહત્વપૂર્ણ ક્ષણો બતાવશે . આથી યુઝર્સને આખો કાર્યક્રમ ફરીથી જોવાની જરૂર નહીં પડે .

JioHotstar માટે Content Commerce નામની નવી સુવિધા પણ જાહેર કરવામાં આવી છે . આ ફીચરની મદદથી યુઝર્સ વિડીયો અથવા લાઈવ સ્ટ્રીમ જોતી વખતે સીધા જ ખરીદી કરી શકશે . એટલે કે , મનોરંજન સાથે ખરીદીનો અનુભવ પણ એક જ પ્લેટફોર્મ પર મળશે . કંપનીએ જણાવ્યું છે કે આ વિચાર IPL દરમિયાન Swiggy ઇન્ટિગ્રેશન જેવા પહેલાના પ્રયોગથી પ્રેરિત છે .

આ ઉપરાંત , Multiview ફીચર પણ રજૂ કરવામાં આવ્યું છે . તેની મદદથી યુઝર્સ એક જ સ્ક્રીન પર એકસાથે અનેક કન્ટેન્ટ ફીડ્સ જોઈ શકશે . રમતગમત , સમાચાર અને મનોરંજન જેવી કેટેગરીમાં આ ફીચર ખાસ ઉપયોગી રહેશે .

રિલાયન્સે AGM દરમિયાન તેના મીડિયા બિઝનેસની સફળતા વિશે પણ માહિતી આપી હતી . કંપની અનુસાર , JioHotstar ના દર મહિને આશરે  451 મિલિયન સક્રિય યુઝર્સ છે . સાથે જ કંપનીએ દાવો કર્યો છે કે JioHotstar એક અબજથી વધુ ડાઉનલોડ્સ મેળવનાર ભારતનું પહેલું પેઈડ OTT પ્લેટફોર્મ બન્યું છે . નવી AI સુવિધાઓ સાથે કંપની તેના ડિજિટલ અને મનોરંજન બિઝનેસને વધુ મજબૂત બનાવવાનો પ્રયાસ કરી રહી છે .