ઓછા ખર્ચે મનોરંજનનો આનંદ , Jio લાવ્યું રૂપિયા 55નું JioTV Pro Pack

Reliance Jio એ પોતાના ગ્રાહકો માટે નવું રૂપિયા 55નું JioTV Pro Pack લોન્ચ કર્યું છે . આ ખાસ મનોરંજન આધારિત પ્લાન એવા યુઝર્સને ધ્યાનમાં રાખીને રજૂ કરવામાં આવ્યો છે , જેઓ ઓછા ખર્ચે Live TVનો આનંદ માણવા માંગે છે . આ પ્લાન હેઠળ ગ્રાહકોને 30 દિવસ માટે 1,000થી વધુ Live TV ચેનલ્સ જોવાની સુવિધા મળે છે . કંપનીના જણાવ્યા મુજબ , તેમાં 150થી વધુ પ્રીમિયમ ચેનલ્સનો પણ સમાવેશ કરવામાં આવ્યો છે . જોકે , આ પ્લાનમાં કોલિંગ , SMS અથવા ડેટા જેવી ટેલિકોમ સેવાઓ ઉપલબ્ધ નથી .

JioTV Pro Pack  દ્રારા યુઝર્સ 16 થી વધુ ભાષાઓમાં ઉપલબ્ધ વિવિધ પ્રકારના ચેનલ્સ જોઈ શકશે . તેમાં મનોરંજન , ફિલ્મો , સમાચાર , બાળકો માટેના કાર્યક્રમો , લાઈફસ્ટાઈલ અને પ્રાદેશિક કન્ટેન્ટ જેવી અનેક કેટેગરીનો સમાવેશ  થાય છે .

આ પ્લાનમાં StarPlus HD, Colors HD, Sony SAB HD, Sony Entertainment Television HD, Discovery, Animal Planet, Sun TV Network અને ETV    જેવા લોકપ્રિય ચેનલ્સ ઉપલબ્ધ છે . જોકે JioStar અને Sonyના સ્પોર્ટ્સ ચેનલ્સ આ પેકનો ભાગ નથી .

આ પ્લાનનો લાભ લેવા માટે ગ્રાહક પાસે સક્રિય Jio પ્રીપેડ અથવા પોસ્ટપેઈડ કનેક્શન હોવું જરૂરી છે . રૂપિયા 55નું રિચાર્જ કર્યા પછી યુઝરે માત્ર Jio TV એપ ખોલીને પોતાના Jio નંબરથી લોગિન કરવાનું રહેશે . કંપનીના જણાવ્યા અનુસાર , કોઈ અલગ એક્ટિવેશન પ્રક્રિયાની જરૂર નહીં પડે અને રિચાર્જ પૂર્ણ થતાં જ પ્રીમિયમ ચેનલ્સનો ઍક્સેસ શરૂ થઈ જશે .

આ પ્લાનનો ઉપયોગ માત્ર એક મોબાઈલ ડિવાઈસ પર Jio TV એપ મારફતે કરી શકાય છે . જો કોઈ યુઝર એકથી વધુ વખત આ પ્લાનનું રિચાર્જ કરે છે , તો નવા પેક આપમેળે લાઈનમાં ઉમેરાશે અને પહેલાનો પ્લાન પૂર્ણ થયા પછી આવતા 30 દિવસનો પ્લાન સક્રિય થઈ જશે . ઓછા ખર્ચે Live TV જોવાની ઈચ્છા ધરાવતા ગ્રાહકો માટે આ એક સારો વિકલ્પ બની શકે છે .