WhatsApp યુઝરનેમથી મળશે નવી પ્રાઈવસી , નંબર રહેશે હાઇડ 

WhatsApp હવે આખરે યુઝરનેમ ફીચર લાવી રહ્યું છે , એટલે કે ટૂંક સમયમાં તમે તમારો મોબાઈલ નંબર શેર કર્યા વગર પણ લોકો સાથે ચેટ કરી શકશો .  Telegram અને  Instagram જેવી રીતે , હવે તમે એક અનોખું યુઝરનેમ બનાવી શકશો અને લોકો સાથે શેર કરી શકશો . કોઈ વ્યક્તિ તમને  તમારા  યુઝરનેમ  દ્રારા મેસેજ કરશે તો તેને તમારો નંબર નહીં પરંતુ તમારું હેન્ડલ દેખાશે . જોકે , આ ફીચર વૈકલ્પિક રહેશે , એટલે કે તમે ઈચ્છો તો અત્યારની જેમ નંબર દ્રારા પણ  WhatsAppનો ઉપયોગ ચાલુ રાખી શકશો .

દરેક WhatsApp  એકાઉન્ટ માટે માત્ર એક જ યુઝરનેમ હશે , જેને તમે પછીથી બદલી પણ શકશો અને તેનાથી તમારા ચેટ્સ અથવા એકાઉન્ટ પર કોઈ અસર નહીં પડે . તમારો  ફોન નંબર હજુ પણ સાઈન - ઈન અને એકાઉન્ટ રિકવરી માટે જોડાયેલો રહેશે , પરંતુ યુઝરનેમ દ્રારા સંપર્ક કરનારા લોકોને તે દેખાશે  નહીં  .

WhatsApp પર યુઝરનેમ કેવી રીતે સેટ કરવું ?

• સૌપ્રથમ તમારા Android ફોન અથવા iPhoneમાં WhatsApp ખોલો 
• ત્યારબાદ સેટિંગ મેનુમાં જાઓ . Androidમાં ઉપર જમણી બાજુના ત્રણ ડોટ્સ પર ટેપ  કરીને સેટિંગ પસંદ કરો , 
• iPhoneમાં નીચે દેખાતા સેટિંગ ટેબ પર ટેપ કરો .
• હવે પેજની ટોચ પર દેખાતા તમારા પ્રોફાઈલ નામ પર ટેપ કરીને એકાઉન્ટ વિગતો ખોલો .
• ત્યારબાદ profile સેટિંગ્સમાં દેખાતા Username વિકલ્પને પસંદ કરો 
• અને તમે રાખવા માંગતા હો તે યુઝરનેમ દાખલ કરો .
• માન્ય યુઝરનેમ દાખલ કર્યા બાદ WhatsApp આપમેળે તપાસશે કે તે ઉપલબ્ધ છે કે નહીં . જો યુઝરનેમ ઉપલબ્ધ હશે , તો Save અથવા Done પર ટેપ કરીને  તમે તેને કન્ફ્રર્મ કરી શકશો .

WhatsApp મુજબ યુઝરનેમ 3 થી 35 અક્ષરો વચ્ચેનું હોવું જોઈએ અને તેમાં ઓછામાં ઓછું એક અક્ષર હોવું જરૂરી છે . તેમાં ફક્ત અક્ષરો , નંબરો , પૂર્ણવિરામ  (.) અને અંડરસ્કોર (_) નો જ ઉપયોગ કરી શકાય છે . યુઝરનેમ " www " થી શરૂ ન થઈ શકે , પૂર્ણવિરામથી શરૂ અથવા સમાપ્ત ન થઈ શકે , સતત બે  પૂર્ણવિરામ ન હોઈ શકે .com , .org અથવા .in જેવા ડોમેન એક્સટેન્શન સાથે પણ સમાપ્ત ન થવું જોઈએ .

એકવાર સેટ થઈ જાય પછી , તમે તમારો મોબાઈલ નંબર આપવાને બદલે તમારું WhatsApp યુઝરનેમ અન્ય લોકો સાથે શેર કરી શકશો . ખાસ કરીને એવા લોકો માટે આ ફીચર ખુબ ઉપયોગી બનશે જે ખરીદદારો , વેચાણકર્તાઓ , સમુદાયના સભ્યો અથવા નવા નંબર સાથે વારંવાર વાત કરે છે અને પોતાનો વ્યક્તિગત નંબર શેર કરવા માંગતા નથી .

WhatsApp એ હાલમાં આ ફીચર કેટલાક Android અને iPhone યુઝર્સ માટે રોલઆઉટ કરવાનું શરૂ કર્યું  છે . ફીચર ઉપલબ્ધ થયા બાદ , યુઝર્સ નક્કી કરી શકશે કે  લોકો તેમને ફોન નંબરથી શોધી શકે , યુઝરનેમથી શોધી કે પછી બંને રીતે  શોધી શકે છે .