WhatsApp માં યુઝર્સ નેમ ફીચર : હવે ફોન નંબર વગર પણ ચેટિંગ શક્ય

WhatsApp ઘણા સમયથી નવા યુઝરનેમ ફીચર પર કામ કરી રહ્યો છે . ગયા વર્ષે નવેમ્બરમાં કંપનીએ બિઝનેસ એકાઉન્ટ યુઝર્સને ઈમેઈલ દ્રારા 2026માં આ ફીચર લોન્ચ કરવા માટે તૈયાર રહેવા કહ્યું હતું . હવે નવી રિપોર્ટ મુજબ , આ પ્લેટફોર્મ યુઝર્સને અનન્ય યુઝરનેમ બનાવવાની સુવિધા આપી રહ્યું છે , જે સુરક્ષા અને  પ્રાઇવસીને વધારવા માટે મહત્વપૂર્ણ પગલું માનવામાં આવી રહ્યું છે . હાલમાં આ ફીચર અમુક જ Android અને iOS યુઝર્સ માટે ધીમે ધીમે રોલઆઉટ થઈ રહ્યું છે , જયારે આ વર્ષના અંત સુધીમાં વધુ વ્યાપક રીતે ઉપલબ્ધ થવાની શક્યતા છે . આવનારા સમયમાં યુઝર્સ પોતાના ફોન નંબરની જગ્યાએ યુઝરનેમ શેર કરી શકશે .

WhatsApp યુઝરનેમ : આપણે અત્યાર સુધી શું જાણીએ છીએ 
ફીચર ટ્રેકર WABetaInfo મુજબ , પ્લેટફોર્મે યુઝરનેમ ફીચરનું પ્રારંભિક રોલઆઉટ શરૂ કરી દીધું છે . આ ફીચર યુઝર્સને તેમના એકાઉન્ટ માટે અલગ અને અનન્ય   યુઝરનેમ પસંદ કરવાની તક આપે છે .હાલમાં આ સુવિધા માર્યાદિત સંખ્યામાં Android અને iOS યુઝર્સ માટે ઉપલબ્ધ છે અને ધીમે ધીમે બધા સુધી પહોંચી જશે . જોકે પ્લેટફોર્મે  હજુ સુધી કોઈ સત્તાવાર જાહેરાત કરી નથી .

યુઝર્સ તેમના પ્રોફાઈલ સેટિંગ્સમાં જઈને ચેક કરી શકે છે કે તેઓ આ ફીચરનો ભાગ છે કે નહીં . આ ફીચર આવ્યા પછી , યુઝર્સને નવા લોકો સાથે કનેક્ટ થવા માટે ફોન નંબર આપવાની જરૂર નહીં  પડે ફક્ત યુઝરનેમ શેર કરવાથી કામ ચાલી જશે . આ મોડેલ અન્ય સોશિયલ મીડિયા પ્લેટફોર્મ્સ જેવી રીતે કામ કરશે , જ્યાં ઉપનામ દ્રારા ઓળખ થાય છે  .

યુઝરનેમ માટે નિયમો અને મર્યાદાઓ 

• રિપોર્ટ અનુસાર , યુઝરનેમ માટે કેટલાક ખાસ નિયમો નક્કી કરવામાં આવ્યા છે 

• યુઝરનેમ 3 થી 35 અક્ષરો વચ્ચે હોવું જોઈએ 

• "www " થી શરૂઆત નહીં કરી શકાય 

• ".com ", ".in ", ".edu ", ".net " જેવા ડોમેન સાથે અંત ન હોવો જોઈએ 

• ઓછામાં ઓછો એક અક્ષર હોવો ફરજિયાત છે 

• માત્ર ખાસ ચિન્હો કે નંબરથી યુઝરનેમ બનાવી શકાય નહીં 

• અંડરસ્કોર (_), લોઅરકેસ અક્ષરો અને પીરિયડ (.) વાપરી શકાય 

• મેટા એકાઉન્ટ્સ સાથે કનેક્શન 

Meta પ્લેટફોર્મ્સ પર ઉપલબ્ધ યુઝરનેમ અહીં પણ ઉપયોગ કરી શકાય છે એટલે કે જો તમારું યુઝરનેમ પહેલાથી Instagram કે Facebook પર છે , તો  તમે તેને  અહીં પણ ઉપયોગ કરી શકો છો .

તે માટે યુઝર્સને Accounts Center મારફતે પોતાના એકાઉન્ટ્સ લિંક કરવા પડશે , જેથી તેઓ જે તે યુઝરનેમના માલિક હોવાની પુષ્ટિ કરી શકે .

આ નવું ફીચર ખાસ કરીને  પ્રાઇવસીને ધ્યાનમાં રાખીને ડિઝાઈન કરવામાં આવ્યું છે , જેથી યુઝર્સને તેમની વ્યક્તિગત માહિતી વધુ સુરક્ષિત રાખવામાં મદદ મળે  છે .