Appleના આગામી iPhone Air 2 ને લઈને નવા ખુલાસા , A20 ચિપ સહિત અનેક અપગ્રેડની ચર્ચા

Apple ના આગામી iPhone Air 2  ને લઈને નવી માહિતી સામે આવી છે , જેના કારણે ટેક જગતમાં ફરી ચર્ચા શરૂ થઈ છે . ગયા વર્ષે રજૂ થયેલા iPhone Air ને તેની અત્યંત પાતળી ડિઝાઈન માટે સારી પ્રશંસા મળી હતી , પરંતુ ઓછી ક્ષમતાની બેટરી અને સિંગલ રિયર કેમેરાને કારણે કેટલાક યુઝર્સ નિરાશા પણ વ્યક્ત કરી હતી . હવે નવા લીક્સ સૂચવે છે કે કંપની બીજી જનરેશનના મોડેલમાં આ બંને બાબતોમાં નોંધપાત્ર સુધારો કરી શકે છે .

જાણીતા ટિપસ્ટર " Digital Chat Station  " ના દાવા અનુસાર , iPhone Air 2 માં 3,500mAh ક્ષમતાની બેટરી આપવામાં આવી શકે છે . પહેલાના iPhone Airમાં 3,149mAh બેટરી હતી , તેથી નવા મોડેલમાં વધુ સારી બેટરી બેકઅપ મળવાની શક્યતા વ્યક્ત કરવામાં આવી રહી છે .

નવી લીકમાં એવો પણ દાવો કરવામાં આવ્યો છે કે iPhone Air 2 માં Appleની નવી A20 ચિપનો ઉપયોગ કરવામાં આવશે , જે 2nm પ્રોસેસ પર આધારિત હશે . આ ચિપ વધુ ઝડપી પરફોર્મન્સ સાથે સારી પાવર કાર્યક્ષમતા પણ આપી શકે છે . આ ફોનમાં 6.55 ઇંચની ડિસ્પ્લે મળવાની શક્યતા છે , જે 120Hz રિફ્રેશ રેટને સપોર્ટ કરશે . આ ઉપરાંત , તેમાં 3D Face Recognition જેવી આધુનિક સુરક્ષા સુવિધા પણ જોવા મળી શકે છે .

કેમેરાની વાત કરીએ તો iPhone Air 2 માં પ્રથમ વખત ડયુઅલ રિયર કેમેરા સેટઅપ આપવામાં આવે તેવી ચર્ચા છે . તેમાં 48 મેગાપિક્સલનો મુખ્ય કેમેરા અને અલ્ટ્રા - વાઈડ લેન્સ સામેલ હોઈ શકે છે . હાલના iPhone Air માં માત્ર એક જ 48 મેગાપિક્સલનો રિયર કેમેરા આપવામાં આવ્યો હતો , તેથી આ અપગ્રેડ ફોટોગ્રાફી માટે મહત્વપૂર્ણ સાબિત થઈ શકે છે .

અહેવાલો મુજબ Apple 2027ની શરૂઆતમાં બેઝ iPhone 18 સાથે iPhone Air 2  લોન્ચ કરી શકે છે . જોકે , કંપનીએ અત્યાર સુધી આ અંગે કોઈ સત્તાવાર જાહેરાત કરી નથી , તેથી હાલમાં સામે આવેલી તમામ વિગતોને લીક અને અટકળ તરીકે જ જોવી જોઈએ .