Avatar AIનું નવું મોડેલ Varya ભારતીય સંદર્ભને વધુ સારી રીતે સમજી શકશે .

ભારત આર્ટિફિશિયલ ઇન્ટેલિજન્સ ( AI ) ક્ષેત્રમાં ઝડપથી આગળ વધી રહ્યું છે . આ દરમિયાન ભારતીય સ્ટાર્ટઅપ Avatar AI એ પોતાનું નવું વિડીયો જનરેશન મોડેલ ' Varya ' રજૂ કર્યું છે . કંપનીનો દાવો છે કે આ મોડેલ ખાસ કરીને ભારતીય યુઝર્સની જરૂરિયાતોને ધ્યાનમાં રાખીને વિકસાવવામાં આવ્યું છે , જે વિડીયો બનાવવાની પ્રક્રિયાને વધુ ઝડપી , સસ્તી અને અસરકારક બનાવી શકે છે . Avatar AI ભારત સરકારના India AI Mission હેઠળ પસંદ કરાયેલા 12 સ્ટાર્ટઅપ્સમાં સામેલ છે . 

કંપનીના જણાવ્યા મુજબ , Varya અલીબાબાના ઓપન - સોર્સ વિડીયો જનરેશન મોડેલ Wan 2.2 પર આધારિત છે . જોકે , તેને વધુ હળવું અને ઝડપી બનાવવા માટે ખાસ ઓપ્ટિમાઇઝેશન કરવામાં આવ્યું છે આ માટે  Model Distillation ટેક્નોલોજીનો ઉપયોગ કરવામાં આવ્યો છે , જે કમ્પ્યુટિંગ જરૂરિયાતો ઘટાડીને પણ મોડેલની મુખ્ય ક્ષમતાઓ જાળવી રાખે છે .

કંપનીનો દાવો છે કે Varya વિડીયો જનરેશનની ઝડપમાં નોંધપાત્ર વધારો કરે છે . જ્યાં Wan 2.2 ને વિડીયો બનાવવા માટે લગભગ 50 સ્ટેપ્સની જરૂર પડે છે , ત્યાં Varya માત્ર ચાર સ્ટેપ્સમાં જ પ્રક્રિયા પૂર્ણ કરી શકે છે . આ કારણે વિડીયો જનરેશનની ઝડપમાં લગભગ 10 ગણો વધારો થાય છે અને ખર્ચ પણ નોંધપાત્ર રીત ઘટે છે .

ઉદાહરણ તરીકે , NVIDIA H200 GPU પર Varya 720p રિઝોલ્યુશનમાં 5 સેકન્ડમાં તૈયાર કરી શકે છે . જયારે સમાન કાર્ય  માટે Wan 2.2. ને અંદાજે 1,230 સેકન્ડનો સમય લાગી શકે છે .કંપનીના જણાવ્યા અનુસાર , Varya  પ્રતિ સેકન્ડ લગભગ 48 પૈસાના ખર્ચે વિડીયો જનરેટ કરી શકે છે .

Varya ની સૌથી મોટી વિશેષતા તેની ભારતીય પરિસ્થિતિને સમજવાની ક્ષમતા છે . તેને ખાસ ભારતીય તહેવારો , પરંપરાગત કપડાઓ , ભોજન અને અહીંની વસ્તુઓ જેવી બાબતોને વધુ સારી રીતે ઓળખી શકે છે . પરિણામે AI દ્રારા બનાવાયેલા વિડીયો વધુ કુદરતી અને ભારતીય વાતાવરણ સાથે મેળ ખાતું દેખાય છે .

કંપનીએ આ મોડેલને ઉપયોગમાં સરળ બનાવ્યું છે . યુઝર્સ માત્ર ટેક્સ્ટ પ્રોમ્પ્ટ લખીને અથવા કોઈ ઇમેજ અપલોડ કરીને વિડીયો બનાવી શકે છે . જરૂરિયાત મુજબ વીડિયોને વધુ લાંબો બનાવવા માટે વધારાની ક્લિપ્સ પણ જનરેટ કરી શકાય છે .