YouTube પર Adsથી મળશે રાહત , DuckDuckGo એ લોન્ચ કર્યું બિલ્ટ - ઈન Ad Blocker

પ્રાઇવસી પર ખાસ ધ્યાન આપતા બ્રાઉઝર DuckDuckGo એ YouTube યુઝર્સ માટે એક નવું બિલ્ટ-ઈન Ad Blocking ફીચર રજૂ કર્યું છે . કંપનીનો દાવો છે કે આ ફીચર YouTube પર વિડીયો શરૂ થાય તે પહેલાં આવતી જાહેરાતો તેમજ વિડીયો દરમિયાન દેખાતી મોટાભાગની Ads ને બ્લોક કરવામાં મદદ કરશે . હાલમાં આ સુવિધા iOS , Mac અને Windows વર્ઝનમાં ડિફોલ્ટ રીતે સક્રિય છે , જયારે Android યુઝર્સ તેને Settingsમાં જઈને મેન્યુઅલી ચાલુ કરવું પડશે .

કંપનીએ સ્પષ્ટ કર્યું છે કે આ નવું ફીચર તેના પહેલાથી ઉપલબ્ધ DuckPlayer થી અલગ છે . Duck Playerનો મુખ્ય હેતુ યુઝર્સની પ્રાઇવસી સુરક્ષિત રાખવાનો અને ટ્રેકિંગ કૂકીઝને રોકવાનો છે , જયારે નવું AdBlocking ફીચર સીધું YouTube વેબસાઈટ પર દેખાતી વિડીયો જાહેરાતોને દૂર કરવા માટે તૈયાર કરવામાં આવ્યું છે . બંને ફીચર્સને એકસાથે પણ ઉપયોગમાં લઈ શકાય છે .

DuckDuckGo એ જણાવ્યું છે કે આ Ad Blocking સિસ્ટમ માટે uBlock Origin કમ્યુનિટી દ્રારા જાળવવામાં આવતી ફિલ્ટર લીસ્ટનો ઉપયોગ કરવામાં આવ્યો છે . ઉપરાંત , વધુ સારી કામગીરી માટે કંપનીએ પોતાના કેટલાક વધારાના કમ્પેટિબિલિટી નિયમો પણ ઉમેર્યો છે , જેથી વધુમાં વધુ જાહેરાતોને બ્લોક કરી શકાય .

જોકે કંપનીએ સ્વીકાર્યું છે કે YouTube સમયાંતરે જાહેરાતો બતાવવાની પદ્ધતિમાં ફેરફાર કરતું રહે છે . આવી સ્થિતિમાં ક્યારેક આ ફીચર થોડા સમય માટે અસરકારક ન રહે , જ્યાં સુધી ફિલ્ટર લિસ્ટ અપડેટ ન થાય .

DuckDuckGoનું કહેવું છે કે આ ફીચર ચાલુ હોય ત્યારે કેટલાક કિસ્સાઓમાં વિડીયો લોડ થવામાં થોડો વધારાનો સમય લાગી શકે છે . જોકે વિડીયો શરૂ થયા બાદ પ્લેબેકનો અનુભવ સામાન્ય રહેશે . હાલ આ ફીચર શરૂઆતના તબક્કામાં હોવાથી કંપનીએ યુઝર્સને તેનો ઉપયોગ કરીને બ્રાઉઝર મારફતે અનામિક ફીડબેક મોકલવાની પણ અપીલ કરી છે .

આ નવા અપડેટ સાથે DuckDuckGo  હવે એવા બ્રાઉઝર્સની યાદીમાં સામેલ થઈ ગયું છે , જેમાં બિલ્ટ - ઈન Ad Blocker મળે છે . પહેલા Brave અને Opera જેવા બ્રાઉઝર્સ પણ કોઈ થર્ડ - પાર્ટી એક્સટેન્શન વગર YouTube પરની મોટાભાગની વિડીયો જાહેરાતોને બ્લોક કરવાની સુવિધા આપી ચૂક્યા છે .