Android યુઝર્સ માટે ખુશખબર : WhatsApp લાવી રહ્યું છે હોમ સ્ક્રીન પરથી વોઇસ નોટ મોકલવાની સુવિધા

WhatsApp એ એન્ડ્રોઇડ યુઝર્સ માટે એક નવી અને  ઉપયોગી સુવિધા પર કામ કરવાનું શરૂ કર્યું છે , જે વોઇસ મેસેજ મોકલવાનું વધુ સરળ બનાવી શકે છે . હાલમાં ,  વોઇસ નોટ મોકલવા માટે યુઝર્સને WhatsApp ખોલવું પડે છે , સંબંધિત ચેટ પસંદ કરવી પડે છે અને પછી રેકોર્ડિંગ શરૂ કરવું પડે છે . પરંતુ આવનારા અપડેટમાં આ પ્રક્રિયા વધુ ઝડપી બની શકે છે .  આ ફીચર હાલમાં ડેવલપમેન્ટ સ્ટેજમાં છે અને WhatsApp Beta વર્ઝનમાં જોવા મળ્યું છે .

WABetaInfo ના અહેવાલ મુજબ , WhatsApp એક નવા હોમ સ્ક્રીન વિજેટનુ ટેસ્ટ કરી રહ્યું છે . આ વિજેટની મદદથી યુઝર્સ WhatsApp એપ ખોલ્યા વગર સીધા ફોનની હોમ સ્ક્રીન પરથી વોઇસ મેસેજ રેકોર્ડ અને મોકલી શકશે . આ  ફીચર WhatsApp Beta for Android વર્ઝન 2.26.24.2 માં જોવા મળ્યું છે , જોકે તે હજુ વિકાસના પગલામાં જ છે અને Beta ટેસ્ટર્સ માટે પણ ઉપલબ્ધ નથી .

રિપોર્ટ અનુસાર , આ વિજેટ ફોનની હોમ સ્ક્રીન પર એડ કરવામાં આવશે . યુઝરને ફક્ત વિજેટ પર ટેપ કરીને તરત જ વોઇસ નોટ રેકોર્ડ કરી શકશે . રેકોર્ડિંગ પૂર્ણ થયા બાદ તે પસંદ કરેલા નંબરને સીધું મોકલી શકાશે . આ સુવિધા ખાસ કરીને એવા લોકો માટે ફાયદાકારક સાબિત થઈ શકે છે , જે  દિવસ દરમિયાન વારંવાર વોઇસ મેસેજ મોકલે છે .

આ ઉપરાંત , નવી સુવિધા એક સાથે એકથી વધુ લોકોને વોઇસ મેસેજ મોકલવાની ક્ષમતા પણ આપી શકે છે . તેના કારણે સમયની બચત થશે અને મેસેજ મોકલવાની પ્રક્રિયા વધુ સરળ બનશે . અહેવાલોમાં એવું પણ કહેવામાં આવ્યું છે કે WhatsApp ભવિષ્યમાં આ વિજેટ દ્રારા વોઇસ નોટ્સને સ્ટેટ્સ અપડેટ તરીકે શેર કરવાનો વિકલ્પ પણ આપી શકે છે .

જોકે , કંપનીએ હજુ સુધી આ ફીચર અંગે કોઈ સત્તાવાર જાહેરાત કરી નથી . હાલ આ સુવિધા વિકાસ હેઠળ છે અને સૌથી પહેલા બીટા યુઝર્સ માટે રજૂ કરવામાં આવે તેવી શક્યતા છે . ત્યારબાદ તેને તમામ WhatsApp યુઝર્સ માટે રોલઆઉટ કરવામાં આવી શકે છે .