WhatsApp એકાઉન્ટ હેક થવાથી બચવા જાણો મહત્વપૂર્ણ સુરક્ષા ટિપ્સ

આજના સમયમાં WhatsApp  માત્ર મેસેજિંગ એપ નથી રહી , પરંતુ બેંકિંગ , ઓફિસના કામ અને વ્યક્તિગત વાતચીત માટે પણ તેનો ઘણો  ઉપયોગ થાય છે . તેથી જો કોઈનું WhatsApp એકાઉન્ટ હેક થઈ જાય તો તે ગંભીર સમસ્યા બની શકે છે . જોકે , કેટલીક સરળ પ્રક્રિયાઓ અપનાવીને એકાઉન્ટ ફરીથી સુરક્ષિત બનાવી શકાય છે . WhatsApp  એકાઉન્ટ હેક થવાની સ્થિતિમાં ગભરાવાની જરૂર નથી . નિષ્ણાંતોના જણાવ્યા મુજબ , સૌથી પહેલા ##21# ડાયલ કરીને કોલ અને મેસેજ ફોરવર્ડિંગ બંધ કરવું જોઈએ . પછી ફરિયાદ કરી એકાઉન્ટ રિકવરી માટે અરજી કરી શકાય છે . WhatsApp એકાઉન્ટ રિકવરી માટે અહીં આપેલા પગલાં અનુસરવાથી એકાઉન્ટ પુનઃ પ્રાપ્ત થશે .

દિલ્હી પોલીસના IFSO યુનિટના જોઈન્ટ CP રજનીશ ગુપ્તાના જણાવ્યા અનુસાર , જો WhatsApp  એકાઉન્ટ હેક થવાની શંકા હોય તો સૌથી પહેલા કોલ અને મેસેજ ફોરવર્ડિંગ  બંધ કરવું જોઈએ . તેના માટે ફોનમાં ##21#ડાયલ કરી શકાય છે . આ કોડ સક્રિય ફોરવર્ડિંગ સેવાઓને બંધ કરશે . ઘણી વખત હેકર્સ OTP અને વેરિફિકેશન મેસેજ પોતાના નંબર પર ફોરવર્ડ કરાવીને એકાઉન્ટ પર કબજો જમાવવાનો પ્રયાસ કરે છે .

ફોરવર્ડિંગ બંધ કર્યા બાદ યુઝર્સને WhatsApp ની સત્તાવાર ફરિયાદ પ્રક્રિયાનો ઉપયોગ કરવો જોઈએ . ફરિયાદ ફોર્મમાં પોતાનો મોબાઈલ નંબર , નામ , ઈમેઈલ આઈડી અને એકાઉન્ટ હેક થવા સંબંધિત વિગતો દાખલ કરીને ફરિયાદ નોંધાવી શકાય છે .

ફોર્મ સબમિટ થયા પછી Meta ની ટીમ આખા મામલાની તપાસ કરે છે . જો એકાઉન્ટમાં કોઈ અનધિકૃત એન્ટ્રી દેખાય તો  , હેકરના ડિવાઈસમાંથી એકાઉન્ટ લોગ આઉટ કરવામાં આવી શકે છે . ત્યારબાદ યુઝર્સ પોતાના મોબાઈલ નંબર અને OTPની મદદથી ફરીથી એકાઉન્ટમાં લોગિન કરી શકે છે .

સાયબર સુરક્ષા નિષ્ણાંતો WhatsApp માં ટુ - સ્ટેપ વેરિફિકેશન ચાલુ રાખવાની સલાહ આપે છે . આ ઉપ્પ્રંત અજાણી લિંક્સ , શંકાસ્પદ OTP અથવા સ્ક્રીન - શેરિંગની વિનંતીઓથી દૂર રહેવું જોઈએ . જો એકાઉન્ટ હેક થવાની શંકા હોય તો તરત જ પગલાં લેવાથી વ્યક્તિગત માહિતી અને ચેટ્સના દુરુપયોગને અટકાવી શકાય છે .