દરેક ટ્રાન્ઝેક્શનમાં PINની ઝંઝટ નહીં , UPI Liteના ફાયદા અને સેટઅપ જાણો

જો તમે રોજિંદા જીવનમાં વારંવાર નાના UPI પેમેન્ટ કરો છો અને દરેક વખતે UPI PIN દાખલ કરવો કંટાળાજનક લાગતો હોય , તો UPI Lite તમારા માટે ખુબ જ ઉપયોગી સુવિધા બની શકે છે . નેશનલ પેમેન્ટ્સ કોર્પોરેશન ઓફ ઇન્ડિયા ( NPCI ) દ્રારા શરૂ કરાયેલી આ સુવિધા યુઝર્સને નાની કિંમતના UPI ટ્રાન્ઝેક્શન PIN વગર કરવાની સુવિધા આપે છે . Google Pay , PhonePe , Paytm સહિત  અનેક બેંકિંગ એપ્સમાં UPI Lite ઉપલબ્ધ છે . જો તમે હજુ સુધી આ ફીચરનો ઉપયોગ કર્યો નથી , તો તેને એક્ટિવ કરવાની પ્રક્રિયા ખુબ જ સરળ છે . 

UPI Lite શું છે ?

UPI Lite એક ઓન - ડિવાઈસ ડિજિટલ વોલેટની જેમ કાર્ય કરે છે . તેમાં તમે તમારા બેંક ખાતામાંથી પહેલાથી જ ચોક્કસ રકમ ટ્રાન્સફર કરી શકો છો . ત્યારબાદ , નાના UPI પેમેન્ટ માટે આ જ બેલેન્સનો ઉપયોગ થાય છે . પરિણામે , દરેક ટ્રાન્ઝેક્શન વખતે UPI PIN દાખલ કરવાની જરૂર રહેતી નથી , જેનાથી ચુકવણી વધુ ઝડપી બની શકે છે .

UPI Lite કેવી રીતે એક્ટિવેટ કરશો ?

UPI Lite ચાલુ  કરવાની પ્રક્રિયા અલગ - અલગ એપ્સમાં થોડી અલગ હોઈ શકે છે , પરંતુ તેના મુખ્ય સ્ટેપ તો લગભગ સમાન રહેશે .

• સૌપ્રથમ  Google Pay , PhonePe , Paytm અથવા તમારી બેંકની UPI એપ ખોલો .
• ત્યારબાદ પ્રોફાઈલ અથવા UPI Setting વિભાગમાં જઈ UPI Lite નો વિકલ્પ પસંદ કરો . હવે જે બેંક ખાતાને UPI Lite સાથે જોડવું હોઉં તે પસંદ કરો .
• હવે આગળના પગલામાં UPI Lite માં એડ કરવાની રકમ દાખલ કરો .
• એક વખત UPI PIN દ્રારા ટ્રાન્ઝેક્શનને મંજૂરી આપો .
• રકમ ઉમેરાયા બાદ UPI Lite સક્રિય થઈ જશે .
• અને હવે તમે નાના પેમેન્ટ PIN વગર કરી શકશો .

UPI Lite ના મુખ્ય ફાયદા 

UPI Liteનો સૌથી મોટો લાભ એ છે કે નાના પેમેન્ટ માટે વારંવાર PIN દાખલ કરવાની જરૂર રહેતી નથી , જેના કારણે ટ્રાન્ઝેક્શન ઝડપથી પૂર્ણ થાય છે . આ ઉપરાંત , નાની કિંમતના વધારે વ્યવહારો બેંક સ્ટેટમેન્ટમાં અલગથી દેખાતા નથી , જેથી સ્ટેટમેન્ટ વધુ વ્યવસ્થિત રહે છે .

ઉપયોગ કરતા પહેલા આ બાબતો ધ્યાનમાં રાખો 

UPI Lite નો લાભ લેવા માટે તમારી બેંક અને UPI  એપ બંને આ સુવિધાને સપોર્ટ કરતી હોવી જરૂરી છે . ઉપરાંત , તેમાં માર્યાદિત રકમ જ રાખી શકાય છે . બેલેન્સ સમાપ્ત થઈ જાય તો ફરીથી રકમ ઉમેરવી પડે છે . સાથે જ શ્રેષ્ઠ અનુભવ માટે એપનું નવું વર્ઝન ઇન્સ્ટોલ કરેલું હોવું જોઈએ .

જો તમે ચા - નાસ્તો , કરિયાણું , કેબ ભાડું અથવા અન્ય બીજા નાના ખર્ચ માટે નિયમિત UPIનો ઉપયોગ કરો છો , તો UPI Lite તમારા પેમેન્ટને વધુ સરળ , ઝડપી અને અનુકૂળ બનાવી શકે છે .

UPI Lite સાથે , વારંવાર PIN દાખલ કર્યા વિના નાના UPI પેમેન્ટ કરી શકાય છે