મોબાઈલ ચલાવવાનો ખર્ચ વધશે ? Jio - Airtel ટૂંક જ સમયમાં વધારી શકે છે પ્રીપેડ પ્લાનના ભાવ

દેશની અગ્રણી ટેલિકોમ કંપનીઓ Jio અને Airtelના કરોડો ગ્રાહકો માટે આગામી દિવસોમાં મોબાઈલ રિચાર્જનો ખર્ચ વધી શકે છે . મીડિયા રિપોર્ટ્સ અનુસાર , બંને કંપનીઓ પોતાના પ્રીપેડ પ્લાનની કિંમતોમાં અંદાજે 15 થી 20 ટકા સુધીનો વધારો કરવાની તૈયારીમાં છે . જો આ વધારો અમલમાં આવશે , તો દર મહિને રિચાર્જ કરાવતા ગ્રાહકોના ખર્ચમાં નોંધપાત્ર વધારો જોવા મળી શકે છે .

હાલમાં જ વિશ્વભરમાં આર્થિક મુશ્કેલી અને વધતી મોંઘવારીને કારણે સામાન્ય લોકો પહેલેથી  જ વધારાના ખર્ચનો સામનો કરી રહ્યા છે . આવી સ્થિતિમાં મોબાઈલ સેવાઓ માટે  વધુ રૂપિયા ચૂકવવા પડે તો તેની સીધી અસર ગ્રાહકોના માસિક બજેટ પર પડશે . ખાસ કરીને એવા યુઝર્સ માટે આ વધારો વધુ ભારરૂપ બની શકે છે , જેઓ દર મહિને નિયમિત પ્રીપેડ રિચાર્જ કરાવે છે .

Telecom Talk ના અહેવાલ મુજબ , Jio અને Airtel બંને પોતાના ટેરિફ પ્લાનમાં 15 થી 20 ટકા સુધીનો વધારો કરી શકે છે . જોકે , આ અંગે બંને કંપનીઓ તરફથી હજુ સુધી કોઈ સત્તાવાર જાહેરાત કરવામાં આવી નથી . તેથી હાલમાં આ માત્ર સંભાવના તરીકે જોવામાં આવી રહી છે .

છેલ્લા કેટલાક વર્ષોમાં ટેલિકોમ કંપનીઓ અનેક વખત પોતાના  રિચાર્જ પ્લાનના દરોમાં વધારો કરી ચૂકી છે . બીજી તરફ સ્માર્ટફોનના વધતા ભાવ પણ ગ્રાહકો માટે ચિંતાનો વિષય બન્યા છે . મેમરી ચિપ સહિતના હાર્ડવેર ખર્ચમાં થયેલા વધારાને કારણે નવા સ્માર્ટફોન ખરીદવા માટે પણ વધુ ખર્ચ કરવો પડી રહ્યો છે . જો હવે રિચાર્જ પ્લાન પણ મોંઘા થશે , તો મોબાઈલ નો કુલ ખર્ચ વધુ વધી જશે .

મહત્વની વાત એ પણ છે કે સંભવિત ભાવવધારાની ચર્ચા એવા સમયે સામે આવી છે જયારે ઘણા યુઝર્સ હજુ પણ નેટવર્ક ક્વોલિટી , કોલ ડ્રોપ અને ધીમી ઈન્ટરનેટ સ્પીડ જેવી સમસ્યાઓ અંગે ફરિયાદ કરી રહ્યા છે , આવા સંજોગોમાં જો રિચાર્જ પ્લાનના દરોમાં વધારો થશે , તો ગ્રાહકોમાં અસંતોષ વધવાની શક્યતા છે . હવે સૌની નજર Jio અને Airtel ની સત્તાવાર જાહેરાત પર ટકેલી છે .