પબ્લિક Instagram ફોટોથી AI ઈમેજ બનાવતું Metaનું ફીચર હટાવાયું

Meta એ થોડા દિવસ પહેલાં તેના " Muse Image " AI ટૂલમાં એક નવું ફીચર શરૂ કર્યું હતું . આ ફીચરની મદદથી કોઈપણ વ્યક્તિ પબ્લિક Instagram એકાઉન્ટ ધરાવતા યુઝરના ફોટાના આધારે AI ઈમેજ બનાવી શકતો હતો . તેના માટે માત્ર પ્રોમ્પટમાં તે Instagram એકાઉન્ટને ટેગ કરવું પૂરતું હતું .

આ ફીચર લોન્ચ થતાં જ સોશિયલ મીડિયા પર તેની ભારે ચર્ચા થઈ હતી . ઘણા લોકોએ પ્રાઈવસી અંગે ચિંતા વ્યક્ત કરી હતી . વધતા વિરોધ બાદ Meta એ હવે આ ફીચર સંપૂર્ણપણે બંધ કરી દીધું છે . જોકે ,  Muse Imageના અન્ય  AI ઈમેજ જનરેશન ફીચર્સ પહેલાની જેમ ઉપલબ્ધ રહેશે .

મેટાએ પોતાના અધિકૃત બ્લોગમાં જણાવ્યું છે કે આ ફિચરનો હેતુ લોકોને વધુ સર્જનાત્મક રીતે AIનો ઉપયોગ કરવાની તક આપવાનો હતો . સાથે જ યુઝર્સને તેમના પબ્લિક કન્ટેન્ટનો આ રીતે ઉપયોગ થઈ શકે કે નહીં તે નક્કી કરવાનો વિકલ્પ પણ આપવામાં આવ્યો હતો . પરંતુ યુઝર્સ અને કેટલીક જાણીતી હસ્તીઓ તરફથી મળેલી ટીકા બાદ કંપનીએ માન્યું કે આ ફીચર  લોકોની અપેક્ષા મુજબ સાબિત થયું નથી .

વિવાદનું મુખ્ય કારણ એ હતું કે પબ્લિક Instagram ધરાવતા તમામ યુઝર્સ આ ફીચરમાં આપમેળે સામેલ હતા . જો કોઈ વ્યક્તિ પોતાની ફોટોનો AI માટે ઉપયોગ ન ઇચ્છતી હોય , તો તેને જાતે જ સેટિંગ્સમાં ફેરફાર કરવો પડતો હતો . ઉપરાંત , કોઈએ તેની AI ઈમેજ બનાવી હોય તો તેની જાણ પણ સંબંધિત યુઝરને કરવામાં આવતી નહોતી .

આ બાબતને લઈને ઘણા લોકોએ કહ્યું કે કોઈની સ્પષ્ટ મંજૂરી વગર તેની AI ઈમેજ બનાવવી યોગ્ય નથી અને તેનો ખોટો ઉપયોગ પણ થઈ શકે છે . જોકે , Meta એ 18 વર્ષથી ઓછી ઉંમરના યુઝર્સ અને પ્રાઈવેટ Instagram એકાઉન્ટ્સને આ ફીચરથી બહાર રાખ્યા હતા .

ફીચર બંધ કરવાની સાથે Metaએ Instagramની સેટિંગ્સમાંથી " Allow people to reuse your content on Instagram and with AI features on Meta " નામનો વિકલ્પ પણ દૂર કરી દીધો છે . હાલ કંપનીએ માત્ર આ વિવાદિત ફીચર બંધ કર્યું છે , જયારે Muse Imageના અન્ય AI ફીચર્સ પહેલાની જેમ ઉપયોગ માટે ઉપલબ્ધ છે .